غازی آباد :نابالغہ کے ساتھ عصمت دری کے بعد آتشزدگی، توڑ پھوڑ

غازی آباد ، 30اگست ( آئی این ایس انڈیا )

یوپی کے غازی آباد سے ایک حیران کن معاملہ سامنے آیا ہے۔ ایک نوجوان نے 14 سالہ لڑکی کو زیادتی کا نشانہ بنا ڈالا۔ واقعہ کے منظر عام پر آنے کے بعد مقامی لوگوں نے احتجاج کیا ہے۔ اس کے علاوہ مشتعل لوگوں نے آتش زنی کے ساتھ توڑ پھوڑ شروع کردی۔ مرکزی ملزم کو گرفتار کر لیا گیا ہے۔ ملزم نوجوان کا تعلق دوسری برادری سے بتایا جاتا ہے۔ ایسے میں ہندو تنظیموں نے بھی پولیس سے اس معاملے میں فوری کارروائی کا مطالبہ کیا ہے۔

پولیس میں درج کرائی گئی شکایت میں متاثرہ کے اہل خانہ نے بتایا کہ بدھ کی شام چھ بجے بجلی بند ہونے کے بعد تین سے چار لوگ پچھلے دروازے سے گھر میں داخل ہوئے۔ انہوں نے الزام لگایا کہ ملزم کباڑ کا سوداگر تھا اور اس نے لڑکی کی عصمت دری کی۔ لواحقین نے لڑکی پر تشدد کی رپورٹ بھی درج کرائی ہے۔ پولیس نے بھی اس معاملے کی تفتیش شروع کر دی ہے۔ واقعہ کے بعد مشتعل لوگوں نے سوریہ نگر چوکی کے باہر ہنگامہ کیا۔

احتجاج کے دوران لوگ اسکریپ کا کاروبار کرنے والے ملزم کی دکان میں گھس گئے اور سامان باہر پھینک دیا۔یہاں موجود ایک ای رکشہ کو بھی آگ لگا دی گئی۔ ملزم کو گرفتار کر لیا گیا ہے۔ متاثرہ کے والد کا الزام ہے کہ واقعے کے وقت تین لڑکے باہر کھڑے تھے جنہیں ابھی تک گرفتار نہیں کیا گیا۔جب لوگ احتجاج کر رہے تھے تو پولیس نے انہیں بہت سمجھایا لیکن لوگ نہیں مانے۔ اس کے بعد پولیس نے طاقت کا استعمال کیا اور تقریباً 8:30 بجے لوگوں کوبزور طاقت ہٹا دیا گیا۔