__ اویسی اور چندر شیکھر کا ممکنہ اتحاد __ (اترپردیش کی سیاست میں نئے سیاسی تجربے کی بازگشت، دلت مسلم آبادی کے اعداد و شمار اور انتخابی زمینی حقائق کے درمیان ایک بڑا سوال)
✍️ افتخاراحمدقادری
اترپردیش کی سیاست ذات پات کی پیچیدہ تقسیم، مذہبی شناخت، علاقائی اثر و رسوخ، سیاسی وفاداریوں، تنظیمی قوت اور ووٹروں کی اجتماعی نفسیات مل کر انتخابی نتائج کا تعین کرتی ہیں۔ یہی وجہ ہے کہ اس ریاست میں کسی بھی نئے سیاسی اتحاد کی بازگشت محض دو جماعتوں کے باہمی اشتراک کا معاملہ نہیں ہوتی بلکہ اس کے اثرات پورے سیاسی منظرنامے کو متاثر کرنے کی صلاحیت رکھتے ہیں۔ ان دنوں آل انڈیا مجلس اتحاد المسلمین کے سربراہ اسدالدین اویسی اور بھیم آرمی و آزاد سماج پارٹی کے سربراہ چندر شیکھر آزاد کے درمیان ممکنہ سیاسی اتحاد کی خبریں اور قیاس آرائیاں اتر پردیش کی سیاست میں ایک نئی بحث کو جنم دے رہی ہیں۔ آنے والے اسمبلی انتخابات کے پیش نظر اس مجوزہ اتحاد کو دلت مسلم یکجہتی کے ایک نئے تجربے کے طور پر پیش کیا جا رہا ہے، لیکن اس کے مضمرات پر غور کیا جائے تو کئی ایسے سوالات سامنے آتے ہیں جنہیں محض سیاسی جوش و خروش میں نظرانداز نہیں کیا جا سکتا۔
سوشل میڈیا پر ان دنوں چندر شیکھر آزاد سے منسوب ایک بیان بھی گردش کر رہا ہے جس میں اویسی کے ساتھ اتحاد کی صورت میں دلت اور مسلم آبادی کو ایک مشترکہ سیاسی قوت بنانے کا تصور پیش کیا گیا ہے۔ اس بیان میں دلتوں کی تقریباً 23 فیصد اور مسلمانوں کی لگ بھگ 20 فیصد آبادی کا حوالہ دیتے ہوئے یہ تاثر دیا گیا ہے کہ دونوں طبقات متحد ہو جائیں تو ریاست کی سیاست کا رخ تبدیل کیا جا سکتا ہے۔ اسی سلسلے میں ڈھائی سال اسدالدین اویسی اور ڈھائی سال چندر شیکھر آزاد کے وزارتِ اعلیٰ کے عہدے پر فائز رہنے کا تصور بھی بیان کیا گیا ہے۔ تاہم اس بیان کی مستند حیثیت اور دونوں رہنماؤں کے درمیان کسی حتمی سیاسی معاہدے کی تفصیلات کی تصدیق ضروری ہے۔ سیاسی امکانات کو قطعی فیصلوں کا درجہ دینا صحافتی دیانت کے منافی ہوگا۔ بہرحال اس تصور کے سیاسی مضمرات سے انکار نہیں کیا جا سکتا۔ بظاہر دلت اور مسلم آبادی کا مجموعی تناسب انتخابی اعتبار سے غیر معمولی اہمیت رکھتا ہے۔
اگر یہ دونوں طبقات کسی مشترکہ سیاسی حکمت عملی کے تحت متحد ہو جائیں تو اتر پردیش کے کئی انتخابی حلقوں میں اقتدار کی روایتی مساوات تبدیل ہو سکتی ہے۔ لیکن سیاست کا بنیادی اصول یہ ہے کہ آبادی کا تناسب لازماً انتخابی کامیابی کی ضمانت نہیں ہوتا۔ ووٹوں کی تعداد کو سیاسی قوت میں تبدیل کرنے کے لیے مضبوط تنظیم، قابلِ اعتماد قیادت، زمینی سطح پر مسلسل جدوجہد، مشترکہ پروگرام اور باہمی اعتماد ناگزیر ہوتے ہیں۔ محض دو طبقات کی آبادی جمع کر دینے سے اقتدار کی راہ ہموار نہیں ہو جاتی۔ اترپردیش کی سیاسی تاریخ میں دلت اور مسلم اتحاد کا تصور کوئی نیا تجربہ نہیں ہے۔ ماضی میں بہوجن تحریک کے بانی کانشی رام نے بھی اسی نوعیت کی سیاسی صف بندی کا خواب دیکھا تھا۔
ان کی سیاسی بصیرت کا ایک اہم پہلو یہ تھا کہ انہوں نے سماج کے ان طبقات کو ایک مشترکہ پلیٹ فارم پر لانے کی کوشش کی جو طویل عرصے سے سیاسی اقتدار کے مرکزی دھارے میں اپنی مؤثر نمائندگی کے لیے جدوجہد کر رہے تھے۔ اس وقت مسلمانوں اور دلتوں کے درمیان سیاسی اشتراک کی کوششوں نے ایک نئی امید پیدا کی تھی۔ جامع مسجد دہلی کے سابق شاہی امام مولانا سید عبداللہ بخاری مرحوم نے بھی اس سلسلے میں اہم کردار ادا کیا تھا۔ اس زمانے میں دلتوں کے اندر سیاسی بیداری کی ایک مضبوط لہر موجود تھی اور مسلمان بھی اپنے سیاسی مستقبل کے حوالے سے مختلف امکانات کا جائزہ لے رہے تھے۔ اس کے باوجود یہ تجربہ وہ مطلوبہ کامیابی حاصل نہ کر سکا جس کی توقع کی جا رہی تھی۔
کانشی رام نے اس ناکامی کے پس منظر میں مسلمانوں کے سیاسی کردار پر بھی سوالات اٹھائے تھے۔ ان کا خیال تھا کہ جس طرح دلتوں کو اپنی سیاسی قوت کا احساس ہونا چاہیے اسی طرح مسلمانوں کو بھی محض کسی دوسری جماعت کے انتخابی حلیف بننے کے بجائے اپنی سیاسی حیثیت کا ادراک کرنا چاہیے۔ تاہم تاریخ کا یہ باب آج بھی ایک بنیادی سوال اپنے اندر سموئے ہوئے ہے کہ اگر دلت اور مسلمان سماجی اعتبار سے متعدد مشترک مسائل رکھتے ہیں تو پھر ان کی سیاسی یکجہتی بار بار انتشار کا شکار کیوں ہو جاتی ہے؟ اس کا جواب محض ایک دوسرے پر الزام تراشی میں نہیں بلکہ دونوں طبقات کی سیاسی ترجیحات، قیادت کے اختلافات، انتخابی مصلحتوں اور باہمی عدم اعتماد کے تجزیے میں پوشیدہ ہے۔
آج چندر شیکھر آزاد اور اسدالدین اویسی اسی پرانے سیاسی تصور کو ایک نئے قالب میں پیش کرنے کی کوشش کرتے دکھائی دیتے ہیں لیکن کیا دونوں رہنما اپنے اپنے طبقات کے اندر اتنا وسیع اعتماد حاصل کر چکے ہیں کہ ایک ریاست گیر سیاسی اتحاد کی قیادت کر سکیں؟ چندر شیکھر آزاد کی سیاسی شناخت بھیم آرمی کی جدوجہد سے وابستہ رہی ہے۔ انہوں نے دلت حقوق، سماجی مساوات اور آئینی تحفظات کے موضوعات پر اپنی ایک الگ پہچان قائم کی ہے۔ پارلیمانی سیاست میں بھی انہیں کامیابی حاصل ہوئی لیکن انفرادی انتخابی کامیابی اور ریاست گیر تنظیمی استحکام دو بالکل مختلف چیزیں ہیں۔ کسی ایک انتخابی حلقے میں کامیابی حاصل کر لینا اس بات کا ثبوت نہیں کہ پورے صوبے کا دلت طبقہ کسی ایک قیادت کے پیچھے متحد ہو چکا ہے۔ اسی طرح اسدالدین اویسی کی سیاسی قوت کو بھی محض ان کے جلسوں میں جمع ہونے والے ہجوم سے نہیں ناپا جا سکتا۔ ان کی خطابت، آئینی حقوق پر گفتگو، مسلمانوں کے سیاسی تشخص کا اظہار اور پارلیمانی مباحث میں جارحانہ انداز انہیں ایک نمایاں سیاسی شخصیت بناتے ہیں۔ لیکن اتر پردیش کی انتخابی سیاست میں ان کی جماعت کی محدود کامیابیوں کو بھی نظرانداز نہیں کیا جا سکتا۔ کسی رہنما کی تقریر پر تالیاں بجانے والے افراد اور انتخاب کے دن اس کے حق میں ووٹ ڈالنے والے افراد ہمیشہ ایک ہی تناسب میں نہیں ہوتے۔ جلسوں کی رونق انتخابی کامیابی کا پیمانہ نہیں بن سکتی۔ سیاسی مقبولیت کا اصل امتحان پولنگ مراکز پر ہوتا ہے، جہاں جذباتی وابستگی کے بجائے ووٹر اپنی ترجیحات، مقامی حالات اور سیاسی امکانات کو سامنے رکھ کر فیصلہ کرتا ہے۔
اترپردیش میں مسلمانوں کی ایک بڑی تعداد انتخابی سیاست میں فیصلہ کن کردار ادا کرنے کی صلاحیت رکھتی ہے، مگر یہ صلاحیت اسی وقت نتیجہ خیز ثابت ہوتی ہے جب ووٹوں کی تقسیم، انتخابی مقابلے کی نوعیت اور امیدواروں کی کامیابی کے امکانات کو سامنے رکھ کر حکمت عملی مرتب کی جائے۔ گزشتہ کئی انتخابات میں یہ دیکھا گیا ہے کہ مسلم ووٹ مختلف سیاسی جماعتوں اور امیدواروں کے درمیان تقسیم ہوئے تو اس کا فائدہ بالواسطہ یا بلاواسطہ اس جماعت کو پہنچا جسے روکنے کے لیے متعدد طبقات انتخابی اتحاد کی کوشش کر رہے تھے۔ اس لیے اویسی اور چندر شیکھر کے ممکنہ اشتراک کو صرف ایک نئے سیاسی تجربے کے طور پر دیکھنا کافی نہیں بلکہ اس کے انتخابی نتائج کا باریک بینی سے جائزہ لینا بھی ضروری ہے۔
اترپردیش میں سماجوادی پارٹی ایک بڑی سیاسی قوت کے طور پر موجود ہے جس کا انتخابی ڈھانچہ، علاقائی تنظیم، کارکنوں کا نیٹ ورک اور مختلف سماجی طبقات میں سیاسی اثر و رسوخ کسی نئے اتحاد کے مقابلے میں زیادہ مستحکم ہے۔ اگر اویسی اور چندر شیکھر واقعی ریاست میں اقتدار کے متبادل کی تشکیل چاہتے ہیں تو انہیں پہلے یہ واضح کرنا ہوگا کہ ان کا سیاسی پروگرام کیا ہے؟ وہ سماجی انصاف، تعلیم، روزگار، صحت، اقلیتوں کے تحفظ، دلت حقوق اور آئینی اداروں کی خودمختاری کے حوالے سے کون سا عملی خاکہ پیش کریں گے؟ محض وزارتِ اعلیٰ کی مدت کو ڈھائی ڈھائی سال میں تقسیم کر دینے سے عوامی مسائل حل نہیں ہوتے۔ اقتدار کی شراکت کا اعلان کرنا آسان ہے، لیکن اس کے لیے عوامی اعتماد اور انتخابی قوت پیدا کرنا کہیں زیادہ دشوار مرحلہ ہے۔
دوسری طرف بہوجن سماج پارٹی کی سربراہ مایاوتی کو بھی اس سیاسی منظرنامے سے خارج نہیں کیا جا سکتا۔ مایاوتی کی سیاسی حیثیت اور بہوجن سماج پارٹی کی تنظیمی تاریخ اتر پردیش کی سیاست میں ایک الگ اہمیت رکھتی ہے۔ انہوں نے طویل عرصے تک دلت سیاست کو ایک منظم انتخابی قوت میں تبدیل کیے رکھا ہے۔ اگرچہ گزشتہ انتخابات میں ان کی جماعت کی انتخابی کارکردگی میں نمایاں گراوٹ دیکھی گئی، لیکن اس کے باوجود دلت ووٹوں پر ان کے اثرات کو مکمل طور پر ختم شدہ تصور کرنا سیاسی ناپختگی ہوگی۔ مایاوتی کی واپسی کی ہر کوشش نئے اتحادوں کے لیے ایک اضافی چیلنج ثابت ہو سکتی ہے۔ چندر شیکھر کے لیے یہ سوال بھی اہم ہوگا کہ وہ دلت ووٹروں کے سامنے اپنی سیاسی افادیت کس طرح ثابت کریں گے اور مایاوتی کی دیرینہ سیاسی شناخت کے مقابلے میں اپنی قیادت کو کس بنیاد پر قابلِ قبول بنائیں گے۔
دلت ووٹ کسی ایک سیاسی جماعت یا رہنما کی مستقل جاگیر نہیں ہیں۔ اسی طرح مسلم ووٹر بھی کسی مخصوص سیاسی قیادت کے تابع نہیں۔ دونوں طبقات کے اندر علاقائی، سماجی، معاشی اور سیاسی ترجیحات کا تنوع موجود ہے۔ اتر پردیش کے مختلف اضلاع میں دلت سیاست کی نوعیت یکساں نہیں، نہ ہی تمام مسلم اکثریتی حلقوں میں انتخابی رجحانات ایک جیسے ہیں۔ مغربی اتر پردیش، روہیل کھنڈ، مشرقی اتر پردیش، اودھ اور بندیل کھنڈ کے سیاسی حالات میں نمایاں فرق پایا جاتا ہے۔ لہٰذا ریاست گیر اتحاد کا خواب دیکھنے والوں کو ان زمینی حقائق کا ادراک کرنا ہوگا۔ یہ کہنا بھی درست نہیں ہوگا کہ پوری دلت آبادی کسی ایک جماعت کے زیرِ اثر ہے البتہ یہ حقیقت ضرور ہے کہ بی جے پی نے گزشتہ برسوں میں دلت ووٹروں کے مختلف طبقات تک اپنی سیاسی رسائی بڑھانے کی کوشش کی ہے اور اس حکمت عملی کے اثرات انتخابی نتائج میں بھی دکھائی دیے ہیں۔
دوسری جانب سماجوادی پارٹی نے بھی پسماندہ طبقات اور دلت برادریوں کے مختلف حصوں کو اپنے ساتھ جوڑنے کی کوشش کی ہے۔ ایسے میں چندر شیکھر آزاد کے لیے محض دلت مسلم اتحاد کا نعرہ بلند کرنا کافی نہیں ہوگا انہیں یہ ثابت کرنا ہوگا کہ ان کے پاس ایک ایسا قابلِ عمل سیاسی متبادل موجود ہے جو مختلف سماجی گروہوں کو اپنے ساتھ جوڑ سکے۔ ایک تشویش ناک پہلو یہ بھی ہے کہ کہیں دلت مسلم اتحاد کا بلند بانگ نعرہ مسلم ووٹوں کی نئی تقسیم کا سبب نہ بن جائے۔ اگر کسی حلقے میں سماجوادی پارٹی اور مجلس اتحاد المسلمین کے امیدوار آمنے سامنے ہوں اور اسی طرح کسی تیسرے سیاسی امیدوار کی موجودگی بھی مقابلے کو پیچیدہ بنا دے، تو انتخابی نتائج غیر متوقع رخ اختیار کر سکتے ہیں۔ ایسی صورت میں ووٹوں کی معمولی تقسیم بھی کامیابی اور شکست کے درمیان فیصلہ کن فاصلہ پیدا کر سکتی ہے۔
اس کا مطلب یہ ہرگز نہیں کہ مسلمانوں کو اپنی سیاسی قیادت یا نئی جماعتوں کے امکانات پر غور نہیں کرنا چاہیے، بلکہ اصل ضرورت یہ ہے کہ ہر سیاسی دعوے کو اس کے عملی نتائج کی کسوٹی پر پرکھا جائے۔ مسلمانوں کو یہ بھی سمجھنا ہوگا کہ سیاسی خودمختاری اور سیاسی انتشار دو الگ تصورات ہیں۔ اپنی قیادت پیدا کرنا، اپنے مسائل کو سیاسی ایوانوں تک پہنچانا اور اپنے آئینی حقوق کے لیے منظم آواز بلند کرنا یقیناً ضروری ہے، لیکن ایسی حکمت عملی اختیار کرنا جس سے اپنے ہی ووٹوں کی تقسیم کے نتیجے میں مخالف سیاسی قوت مضبوط ہو جائے، سیاسی بصیرت کے تقاضوں سے ہم آہنگ نہیں ہو سکتا۔ کسی بھی جماعت کو محض اس بنیاد پر قبول یا مسترد نہیں کرنا چاہیے کہ اس کے سربراہ کی تقریر پرجوش ہے یا اس کے جلسوں میں غیر معمولی بھیڑ جمع ہوتی ہے۔
اصل سوال یہ ہونا چاہیے کہ اس جماعت کی تنظیم کتنی مضبوط ہے، اس کے امیدوار کتنے قابلِ اعتماد ہیں، اس کا انتخابی منصوبہ کتنا واضح ہے اور اس کی سیاسی حکمت عملی سے عوام کو حقیقی فائدہ پہنچنے کا کتنا امکان ہے۔ اویسی اور چندر شیکھر اگر واقعی ایک مضبوط سیاسی متبادل کی تشکیل چاہتے ہیں تو انہیں سب سے پہلے اپنے باہمی سیاسی اعتماد کو عوام کے سامنے ثابت کرنا ہوگا۔ وزارتِ اعلیٰ کی تقسیم کے بجائے عوامی مسائل کی تقسیمِ کار، انتخابی نشستوں کے بجائے تنظیمی ذمہ داریوں کی وضاحت اور جذباتی نعروں کے بجائے عملی پروگرام ان کی اولین ترجیح ہونی چاہیے۔ انہیں یہ بھی واضح کرنا ہوگا کہ ان کا اتحاد محض انتخابی مفاہمت ہے یا ایک طویل المدت سیاسی تحریک کی بنیاد۔ کیونکہ انتخابی اتحاد وقتی ضرورت کے تحت وجود میں آ سکتے ہیں، لیکن دیرپا سیاسی قوت کی تشکیل کے لیے نظریاتی ہم آہنگی، تنظیمی استحکام اور عوامی اعتماد بنیادی شرائط ہیں۔
اترپردیش کے مسلمان اس وقت ایک ایسے سیاسی دوراہے پر کھڑے ہیں جہاں جذباتی فیصلوں کے بجائے غیر معمولی سیاسی بصیرت کی ضرورت ہے۔ انہیں کسی جماعت کی اندھی تقلید بھی نہیں کرنی چاہیے اور نہ ہی کسی نئی قیادت کے دعووں سے مرعوب ہو کر اپنی انتخابی ترجیحات کا تعین کرنا چاہیے۔ دلتوں کے ساتھ سماجی انصاف، آئینی حقوق اور محروم طبقات کی سیاسی نمائندگی کے لیے اشتراک یقیناً وقت کی ضرورت ہے، لیکن اس اشتراک کو حقیقی معنوں میں کامیاب بنانے کے لیے اعتماد، خلوص اور عملی جدوجہد لازمی ہے۔ بالآخر سوال یہ نہیں کہ اویسی اور چندر شیکھر اتحاد کر پاتے ہیں یا نہیں بلکہ اصل سوال یہ ہے کہ اس اتحاد سے اترپردیش کے عوام کو کیا حاصل ہوگا؟ کیا یہ اتحاد ریاست میں سماجی انصاف کی نئی بنیاد رکھ سکے گا؟ کیا یہ دلتوں اور مسلمانوں کے دیرینہ مسائل کا قابلِ اعتماد سیاسی حل پیش کرے گا؟
یا پھر انتخابی موسم میں بلند ہونے والا ایک ایسا نعرہ ثابت ہوگا جس کے شور میں ووٹوں کی تقسیم کا ایک نیا باب رقم ہو جائے گا؟ ان سوالات کے جوابات آنے والا وقت دے گا، لیکن مسلمانوں کے لیے یہ وقت جذباتی وابستگی کے بجائے سیاسی شعور کو بیدار رکھنے کا ہے۔ انہیں یاد رکھنا چاہیے کہ انتخابی سیاست میں ایک غلط اندازہ صرف ایک نشست نہیں چھینتا، بعض اوقات پورے صوبے کے سیاسی مستقبل پر اثرانداز ہو جاتا ہے۔ لہٰذا کسی بھی اتحاد کی حمایت سے پہلے اس کے مقاصد، امکانات اور انتخابی مضمرات کا سنجیدہ محاسبہ ناگزیر ہے۔ کیونکہ سیاست میں صرف نعرے نہیں، نتائج بھی اہمیت رکھتے ہیں اور ووٹ کی معمولی لغزش بھی اقتدار کی پوری بساط الٹ سکتی ہے۔
مضمون نگار معروف صحافی و تجزیہ نگار ہیں
iftikharahmadquadri@gmail.com