سونیا گاندھی کی کتاب اور اختلافِ رائے کا بدلتا ہندوستان
(سیاسی عصبیت، فکری تنگ نظری اور اظہارِ خیال کی آزادی کا ایک اہم امتحان)
✍️ افتخار احمد قادری
کانگریس پارلیمانی پارٹی کی سربراہ سونیا گاندھی کی کتاب کی اشاعت نے ہندوستان کے سیاسی، صحافتی اور فکری حلقوں میں ایک نئی بحث کو جنم دے دیا ہے۔ کسی کتاب کی مقبولیت کا پیمانہ محض اس کی فروخت کی رفتار نہیں ہوتا، بلکہ اس کے مندرجات پر اٹھنے والے سوالات، اس کے گرد تشکیل پانے والی فکری کشمکش اور مختلف طبقات کی جانب سے ظاہر کیے جانے والے ردِعمل بھی اس کی معنویت متعین کرتے ہیں۔ سونیا گاندھی کی اس تصنیف کے ساتھ بھی کچھ ایسا ہی منظرنامہ سامنے آرہا ہے۔ کتاب کے منظرِ عام پر آنے کے بعد جہاں قارئین کی ایک بڑی تعداد اس کے مطالعے میں دلچسپی لے رہی ہے، وہیں سیاسی مبصرین، صحافتی حلقے اور مختلف نظریاتی وابستگی رکھنے والے افراد اس کے مندرجات پر اپنی اپنی آرا پیش کر رہے ہیں۔ کسی نے اس کا خیرمقدم کیا ہے تو کسی نے اس کے بعض مندرجات سے اختلاف کیا ہے، لیکن اس پورے معاملے میں سب سے زیادہ قابلِ غور پہلو یہ ہے کہ ایک کتاب کے ذریعے اٹھائے گئے سوالات کا جواب علمی استدلال سے دیا جارہا ہے یا سیاسی عصبیت کے شور میں اصل موضوع کو ہی پسِ پشت ڈالنے کی کوشش کی جارہی ہے؟
سونیا گاندھی نے اپنی اس تصنیف کے ذریعے اپنے سیاسی سفر، خاندانی تجربات اور ان حالات کو قلم بند کرنے کی کوشش کی ہے جن سے ان کی زندگی مختلف ادوار میں متاثر ہوتی رہی۔ ان کے مطابق ان کے خاندان کے تعلق سے طویل عرصے تک ایسی باتیں گردش کرتی رہی ہیں جنہیں وہ حقیقت کے برعکس سمجھتی ہیں۔ ان کے نزدیک سیاسی مخالفت اور نظریاتی اختلاف کے نام پر بعض اوقات واقعات کو اس انداز میں پیش کیا گیا کہ اصل صورتِ حال پسِ منظر میں چلی گئی اور مفروضوں نے حقائق کی جگہ لے لی۔ چنانچہ انہوں نے اپنی یادداشتوں اور تجربات کو تحریری صورت میں محفوظ کرنے کا فیصلہ کیا، تاکہ ان واقعات کا وہ پہلو بھی سامنے آسکے جسے ان کے خیال میں اب تک مناسب طور پر بیان نہیں کیا گیا تھا۔
یہاں ایک بنیادی سوال پیدا ہوتا ہے کہ کیا کسی سیاسی شخصیت کو اپنی زندگی کے تجربات، اپنے خاندان کے حالات اور اپنے سیاسی سفر کے بارے میں اظہارِ خیال کا حق حاصل نہیں؟ جمہوری معاشرے میں یہ حق کسی ایک جماعت، نظریے یا سیاسی خاندان تک محدود نہیں ہوتا۔ ہر شخص کو اپنے تجربات بیان کرنے، اپنے موقف کی وضاحت کرنے اور اپنے بارے میں قائم شدہ تصورات کو چیلنج کرنے کا اختیار حاصل ہے۔ البتہ اس اختیار کے ساتھ یہ ذمہ داری بھی وابستہ ہے کہ بیان کردہ واقعات کی صحت، تاریخی تناظر اور واقعات کی غیر جانب دارانہ تفہیم کو ملحوظ رکھا جائے۔ اسی طرح قارئین اور ناقدین کو بھی یہ حق حاصل ہے کہ وہ تحریر کے مندرجات کا تنقیدی جائزہ لیں، اس کے دعوؤں کو پرکھیں اور جہاں ضروری سمجھیں وہاں دلیل کے ساتھ اختلاف کریں۔ سونیا گاندھی کا یہ کہنا بھی قابلِ توجہ ہے کہ وہ ابتدا میں کتاب لکھنے کے حوالے سے تذبذب کا شکار تھیں۔ ان کے مطابق ان کے بچوں راہل گاندھی اور پرینکا گاندھی سمیت ایک قریبی دوست کے اصرار نے انہیں اس فیصلے کی طرف مائل کیا۔ اس تفصیل سے یہ اندازہ ہوتا ہے کہ کتاب کی اشاعت محض ایک ادبی سرگرمی نہیں، بلکہ اپنے ماضی کو محفوظ کرنے اور اپنی زندگی کے بعض ایسے گوشوں کو بیان کرنے کی کوشش بھی ہے جن کے بارے میں مصنفہ سمجھتی ہیں کہ عوام کو ان سے واقف ہونا چاہیے۔ کسی بھی سیاسی شخصیت کی خودنوشت یا یادداشتوں کی اہمیت اسی وقت متعین ہوتی ہے جب قارئین انہیں محض شخصی بیان سمجھ کر قبول کرنے کے بجائے تاریخی شعور اور تنقیدی بصیرت کے ساتھ پڑھیں۔
یہ بھی حقیقت ہے کہ سیاسی شخصیات کی تحریروں کو غیر جانب دارانہ تاریخ کا مکمل متبادل قرار نہیں دیا جاسکتا۔ ہر مصنف اپنے تجربات، اپنے زاویۂ نظر اور اپنی فکری ترجیحات کے زیرِ اثر واقعات کو بیان کرتا ہے۔ ممکن ہے ایک ہی واقعے کو دو مختلف شخصیات بالکل مختلف انداز میں پیش کریں۔ اس لیے کسی کتاب میں درج ہر بات کو حرفِ آخر سمجھ لینا بھی درست نہیں اور محض مصنف کی سیاسی وابستگی کی بنیاد پر اس کے پورے متن کو مسترد کردینا بھی علمی دیانت کے منافی ہے۔ اصل ضرورت یہ ہے کہ کتاب کے مندرجات کو دستیاب تاریخی شواہد، مستند دستاویزات اور دیگر متعلقہ بیانات کی روشنی میں جانچا جائے۔ یہی وہ طریقۂ کار ہے جس سے اختلافِ رائے کو تعمیری مکالمے میں تبدیل کیا جاسکتا ہے۔ افسوس ناک صورتِ حال اس وقت پیدا ہوتی ہے جب کسی تصنیف کے مندرجات کا مطالعہ کیے بغیر اس کے خلاف فضا سازی شروع کردی جائے۔ کسی کتاب سے اختلاف کرنا ایک بات ہے اور اس کے مطالعے سے پہلے ہی اس کے خلاف محاذ کھول دینا بالکل دوسری بات۔ علمی دنیا میں تنقید کا ایک مسلمہ اصول ہے کہ پہلے موضوع کو سمجھا جائے، مصنف کے استدلال کو پڑھا جائے، اس کے پیش کردہ شواہد کا جائزہ لیا جائے اور پھر اپنی رائے قائم کی جائے۔ اس کے برعکس اگر کسی تحریر کو محض اس لیے ناقابلِ قبول قرار دے دیا جائے کہ اس کا مصنف سیاسی طور پر ہمارے پسندیدہ حلقے سے تعلق نہیں رکھتا تو یہ طرزِ فکر علمی بلوغت کے بجائے ذہنی انجماد کی علامت بن جاتا ہے۔ کتاب کی نقولات کو نقصان پہنچانے یا انہیں پھاڑنے جیسے واقعات بھی اسی ذہنی رویے کی نشاندہی کرتے ہیں۔ کسی کتاب کو پھاڑ دینے سے اس میں درج کسی بات کی تردید نہیں ہوجاتی، نہ ہی صفحات کو تلف کردینے سے کسی تاریخی واقعے کی حقیقت تبدیل ہوتی ہے۔ اگر کسی مصنف نے غلط معلومات پیش کی ہیں تو ان کی اصلاح کے لیے مستند حوالوں اور مضبوط دلائل کی ضرورت ہوتی ہے، نہ کہ کتاب کی بے حرمتی اور اس کے خلاف جذباتی مظاہروں کی۔ کتاب سے اختلاف رکھنے والا شخص اس کا جواب لکھ سکتا ہے، اس کے دعوؤں کو چیلنج کرسکتا ہے، اس کے مندرجات پر مباحثہ کرسکتا ہے، لیکن اسے یہ حق نہیں پہنچتا کہ دوسروں کے مطالعے کے اختیار کو بھی سلب کرنے کی کوشش کرے۔
ہندوستان کی تہذیبی تاریخ میں کتاب اور مکالمے کو ہمیشہ غیر معمولی اہمیت حاصل رہی ہے۔ یہاں مختلف مذاہب، تہذیبوں، زبانوں اور نظریات کے حامل افراد نے ایک دوسرے سے اختلاف بھی کیا اور اپنے اپنے خیالات کا اظہار بھی کیا۔ یہی تنوع ہندوستانی معاشرت کی ایک بنیادی شناخت رہا ہے۔ اختلاف کو برداشت کرنا، مخالف موقف کو سننا اور دلیل کی بنیاد پر اس کا جواب دینا کسی بھی مہذب معاشرے کی فکری بالیدگی کا مظہر ہے۔ لیکن اگر اختلاف کو دشمنی میں تبدیل کردیا جائے اور کسی سیاسی شخصیت کی تحریر کو اس کی جماعتی وابستگی کے ترازو میں تول کر فیصلہ صادر کردیا جائے تو اس سے معاشرے میں مکالمے کی گنجائش محدود ہونے لگتی ہے۔ گزشتہ ایک دہائی کے دوران ہندوستانی سیاست میں سیاسی تقسیم اور نظریاتی کشیدگی نے کئی نئے مظاہر کو جنم دیا ہے۔ سیاسی مخالفین کے درمیان اختلافات پہلے بھی موجود تھے، حکومتوں پر تنقید بھی ہوتی تھی اور حزبِ اختلاف کے رہنما بھی اقتدار کے فیصلوں کو چیلنج کرتے تھے، لیکن جمہوری سیاست کی اصل خوب صورتی یہ تھی کہ اختلاف کے باوجود سیاسی وجود اور اظہارِ خیال کے حق کو تسلیم کیا جاتا تھا۔ اب صورتِ حال کے بعض پہلو ایسے دکھائی دیتے ہیں جہاں سیاسی مخالفت کے ساتھ شخصی اور نظریاتی مخاصمت بھی شدت اختیار کرتی جارہی ہے۔ کسی رہنما کا بیان ہو، کسی صحافی کا تجزیہ ہو یا کسی مصنف کی کتاب، اس پر گفتگو کرنے سے پہلے ہی اس کی سیاسی شناخت کو موضوعِ بحث بنادیا جاتا ہے۔ اس پورے منظرنامے میں ذرائع ابلاغ کے کردار کا جائزہ لینا بھی ضروری ہے۔ صحافت کا بنیادی فریضہ واقعات کی تحقیق، حقائق کی ترسیل اور عوامی شعور کی آبیاری ہے۔ ایک صحافی یا اینکر کا کام یہ نہیں کہ وہ کسی سیاسی جماعت کے موقف کو بغیر تحقیق کے عوامی حقیقت بنا کر پیش کرے۔ اگر کسی کتاب میں ایسے انکشافات یا دعوے موجود ہیں جو سیاسی اہمیت رکھتے ہیں تو صحافتی اداروں کو چاہیے کہ وہ ان کا غیر جانب دارانہ تجزیہ کریں، متعلقہ افراد کا موقف حاصل کریں اور دستیاب شواہد کی بنیاد پر ناظرین کو صورتِ حال سے آگاہ کریں۔ لیکن جب بعض ٹیلی ویژن مباحثے تحقیق کے بجائے شور و غوغا، الزام تراشی اور کردار کشی کا ذریعہ بن جائیں تو صحافت کا وقار مجروح ہوتا ہے۔ کسی بھی کتاب کے بارے میں رائے قائم کرنے کا حق ہر شخص کو ہے مگر اس حق کے استعمال میں صحافتی ذمہ داری اور فکری دیانت کو فراموش نہیں کیا جانا چاہیے۔
یہاں یہ وضاحت بھی ضروری ہے کہ سونیا گاندھی کی کتاب پر ہونے والی ہر تنقید کو سیاسی تعصب قرار دینا مناسب نہیں ہوگا۔ جمہوریت میں کسی مصنف، سیاست داں یا بااثر شخصیت کو تنقید سے بالاتر نہیں سمجھا جاسکتا۔ اگر کتاب کے کسی حصے میں تاریخی حقائق کی صحت پر سوال اٹھتا ہے، کسی واقعے کی تعبیر پر اختلاف ہے یا کسی بیان کی تائید میں مزید شواہد درکار ہیں تو ان سوالات کا خیرمقدم ہونا چاہیے۔ تنقید کا دروازہ بند کردینا بھی اتنا ہی نقصان دہ ہے جتنا کسی کتاب کو پڑھے بغیر مسترد کردینا۔ سونیا گاندھی کی جانب سے کتاب کی تقریبِ اجرا کے موقع پر تنقید کو عوامی رائے کا حصہ تسلیم کرنے کا اظہار اسی وسیع تر جمہوری رویے کی اہمیت کو نمایاں کرتا ہے۔ ایک مصنف کے لیے یہ سمجھنا ضروری ہے کہ کتاب اشاعت کے بعد صرف اس کی ذاتی ملکیت نہیں رہتی، بلکہ قارئین کے مطالعے، سوالات اور تنقیدی تجزیے کا موضوع بن جاتی ہے۔
دراصل کسی کتاب کی حقیقی قدر و قیمت اس بات سے متعین نہیں ہوتی کہ اس کی تعریف کرنے والوں کی تعداد کتنی ہے یا اس کے مخالفین کتنے زیادہ ہیں۔ اس کا اصل معیار اس میں پیش کردہ مواد، تحقیق کی صحت، اسلوبِ بیان اور تاریخی و فکری اہمیت ہے۔ بعض کتابیں اپنے عہد کے سیاسی حالات کی دستاویز بن جاتی ہیں، بعض شخصی تجربات کے ذریعے تاریخ کے ان گوشوں کو روشن کرتی ہیں جو سرکاری بیانیوں یا عمومی مباحث میں جگہ نہیں بنا پاتے، جب کہ بعض تصانیف اپنے مندرجات کی وجہ سے شدید اختلافات کو جنم دیتی ہیں۔ سونیا گاندھی کی اس کتاب کو بھی اسی تناظر میں پڑھنے اور پرکھنے کی ضرورت ہے۔ اس کے مندرجات سے اتفاق کرنے والوں کو بھی دلیل پیش کرنی چاہیے اور اختلاف رکھنے والوں کو بھی اپنے موقف کے لیے مستند بنیاد فراہم کرنی چاہیے۔
ہندوستانی جمہوریت کا حسن محض انتخابات، پارلیمانی کارروائیوں اور اقتدار کی تبدیلیوں میں پوشیدہ نہیں، بلکہ اس کی اصل روح آزادانہ اظہار، فکری تنوع اور اختلافِ رائے کے احترام میں مضمر ہے۔ اگر کسی سیاسی جماعت کے رہنما کو اپنی یادداشتیں قلم بند کرنے کا حق حاصل ہے تو اسی طرح دوسری جماعتوں کے رہنماؤں اور عام شہریوں کو ان پر تنقید کرنے کا حق بھی حاصل ہے۔ لیکن یہ دونوں حقوق اسی وقت بامعنی رہ سکتے ہیں جب معاشرے میں دلیل کو دشنام طرازی پر اور تحقیق کو پروپیگنڈے پر ترجیح دی جائے۔ سونیا گاندھی کی کتاب کے حوالے سے پیدا ہونے والی بحث کو محض کانگریس اور بی جے پی کے سیاسی تنازعے تک محدود کردینا بھی اس کے وسیع تر مفہوم کو نظر انداز کرنے کے مترادف ہوگا۔ یہ معاملہ دراصل ہمارے اجتماعی فکری مزاج کا امتحان بھی ہے۔ کیا ہم کسی مخالف نظریے کی بات سننے کا حوصلہ رکھتے ہیں؟ کیا ہم اپنی سیاسی پسند و ناپسند سے بالاتر ہوکر کسی تحریر کا مطالعہ کرسکتے ہیں؟ کیا ہمارے اندر یہ ظرف موجود ہے کہ اپنے موقف کے خلاف پیش کیے گئے دلائل کو بھی سنجیدگی سے پرکھ سکیں؟ اگر ان سوالات کے جوابات نفی میں ہیں تو ہمیں محض ایک کتاب کے بارے میں نہیں، بلکہ اپنے جمہوری رویوں کے بارے میں بھی غور کرنا ہوگا۔ ضرورت اس امر کی ہے کہ سیاسی وابستگیوں کی عینک اتار کر مطالعے اور مکالمے کی روایت کو فروغ دیا جائے۔ کسی کتاب میں درج بات غلط ہے تو اسے شواہد کے ساتھ غلط ثابت کیا جائے، کوئی دعویٰ ناقص ہے تو اس کی علمی تردید کی جائے اور کوئی واقعہ یک طرفہ انداز میں پیش کیا گیا ہے تو اس کا دوسرا رخ بھی مستند حوالوں کے ساتھ سامنے لایا جائے۔ یہی وہ راستہ ہے جو معاشرے کو فکری انتشار سے نکال کر سنجیدہ مکالمے کی طرف لے جاسکتا ہے۔ کتابوں کے صفحات پھاڑنے سے تاریخ نہیں بدلتی، البتہ دلیل کے ساتھ لکھی گئی ایک سطر بڑے سے بڑے سیاسی دعوے کو چیلنج کرنے کی صلاحیت رکھتی ہے۔ ہندوستان کو آج شور و غوغا سے زیادہ اسی فکری جرأت، سیاسی رواداری اور علمی دیانت کی ضرورت ہے، کیونکہ جس معاشرے میں اختلاف کرنے کا حق محفوظ نہ رہے، وہاں جمہوریت کا ظاہری ڈھانچہ تو باقی رہ سکتا ہے، مگر اس کی روح رفتہ رفتہ مضمحل ہونے لگتی ہے۔
مضمون نگار معروف صحافی و تجزیہ نگار ہیں
iftikharahmadquadri@gmail.com