ہندوستان اور امریکہ کے درمیان ڈرون خرید کا معاہدہ

نئی دہلی،15اکتوبر (الہلال میڈیا)

ہندوستان نے امریکہ سے 31 پریڈیٹر ڈرون خریدنے کا معاہدہ کیا ہے۔ دونوں ممالک کے درمیان اس معاہدے پر دونوں فریقوں نے دستخط کیے تھے۔ ایک افسر نے یہ اطلاع دی۔ اس معاہدے کے حوالے سے دونوں ممالک کے درمیان کافی عرصے سے بات چیت جاری تھی۔ یہ سودا 32 ہزار کروڑ روپے کا ہے۔ اس سے ہندوستان کی اسٹرائیک اور نگرانی کی صلاحیتوں میں سمندر سے سطح اور آسمان تک مؤثر طریقے سے اضافہ ہو گا۔ کابینہ کمیٹی برائے دفاع نے گزشتہ ہفتے ہی اس معاہدے کی منظوری دی تھی۔ہندوستان میں منعقدہ ایک تقریب میں دونوں ممالک کے اعلیٰ حکام اور فوجی افسران کی موجودگی میں معاہدے پر دستخط کیے گئے۔ ہندوستان کی طرف سے 31 پریڈیٹر ڈرون خریدنے کے دفاعی معاہدے کا اعلان گزشتہ سال وزیر اعظم مودی کے دورہ امریکہ کے دوران کیا گیا تھا۔

اس ڈیل کی اہمیت کے حوالے سے امریکی محکمہ خارجہ کے ترجمان میتھیو ملر نے کہا تھا کہ اس ڈیل سے دونوں ممالک کے تزویراتی تکنیکی تعاون اور فوجی تعاون میں نمایاں اضافہ ہوگا۔دفاعی ماہرین کے مطابق پریڈیٹر ڈرون ایم کیو-9بی کے حصول سے بحر ہند میں ہندوستانی بحریہ کی نگرانی کی طاقت کئی گنا بڑھ جائے گی۔ یہ پریڈیٹر ڈرون امریکی کمپنی جنرل ایٹمکس سے خریدے جائیں گے۔ یہ معاہدہ ہندوستان اور امریکہ کی حکومتوں کے درمیان فارن ملٹری سیلز کنٹریکٹ کے تحت کیا گیا ہے۔ معاہدے کے تحت حاصل ہونے والے 31 پریڈیٹر ڈرونز میں سے ہندوستانی بحریہ کو 15 ڈرون ملیں گے۔جبکہ فضائیہ اور فوج کو 8،8 ڈرون ملیں گے۔

چین جس طرح سے بحر ہند میں اپنا اثر و رسوخ بڑھانے کی کوشش کر رہا ہے اسے دیکھ کر بھارتی بحریہ بھی اپنی صلاحیتوں میں اضافہ کر رہی ہے۔ اب پریڈیٹر ڈرون ملنے کے بعد پاک بحریہ کی طاقت میں نمایاں اضافہ ہو جائے گا کیونکہ یہ پریڈیٹر ڈرون سرحدوں کی نگرانی میں بہت مددگار ثابت ہوں گے۔ ہندوستان اور امریکہ کے درمیان منگل کو دو معاہدوں پر دستخط ہوئے۔ایک معاہدے کے تحت ہندوستان کو امریکہ سے 31 پریڈیٹر ڈرون ملیں گے جبکہ دوسرے معاہدے کے تحت ملک میں ان ڈرونز کی دیکھ بھال اور مرمت کی سہولتیں قائم کی جائیں گی۔

اس دفاعی معاہدے پر امریکہ میں صدارتی انتخابات سے چند ہفتے قبل دستخط کیے گئے ہیں۔ جنرل اٹامکس کے سی ای او وویک لال بھی معاہدے پر دستخط کے وقت دہلی میں موجود تھے۔ ان ریپر یا پریڈیٹر ڈرون کی سب سے بڑی خوبی یہ ہے کہ یہ ڈرون 40 ہزار فٹ سے زیادہ کی بلندی پر تقریباً 40 گھنٹے تک پرواز کر سکتا ہے۔ یہ ڈرون نگرانی اور حملے کے لحاظ سے بہترین ہے اور فضا سے زمین پر درست حملے کرنے کی صلاحیت رکھتا ہے۔ یہ سیٹ لائٹ کے ذریعے ہر قسم کے موسم میں 40 گھنٹے سے زیادہ پرواز کر سکتا ہے۔