جبالیا کو محاصرے اور جبری ہجرت کا سامنا، اسرائیل کا ہسپتال پر دھاوا

جبالیا کو محاصرے اور جبری ہجرت کا سامنا، اسرائیل کا ہسپتال پر دھاوا

غزہ، 25اکتوبر (ایجنسیز)

رواں ماہ کی چھ تاریخ سے غزہ پٹی کے شمال میں جبالیا پر اسرائیلی حملوں کا سلسلہ جاری ہے۔ تازہ ترین کارروائی میں علاقے میں ایک ہسپتال پر بم باری کی گئی ہے۔کمال عدوان ہسپتال کے ڈائریکٹر ڈاکٹر حسام ابو صفیہ نے جمعے کے روز بتایا کہ جبالیا میں واقع ہسپتال پر اسرائیلی ٹینکوں کی مسلسل گولہ باری کے نتیجے میں طبی عملے کے کئی ارکان زخمی ہو گئے۔ خبر کے مطابق اسرائیلی فوج نے کمال عدوان ہسپتال پر دھاوا بول دیا۔ اسرائیلی فوج نے تمام زخمیوں اور ان کے ہمراہ موجود افراد کو ہسپتال کی کھلی جگہ پر اکٹھا کیا اور پھر مردوں کو خواتین سے الگ کر دیا۔

واضح رہے کہ رواں ماہ چھ اکتوبر سے اسرائیل نے غزہ کی پٹی کے شمالی علاقوں پر نیا حملہ شروع کیا۔ فلسطینی شہری دفاع کے مطابق اس کے نتیجے میں چند روز کے دوران میں تقریبا 800 افراد جاں بحق ہو چکے ہیں۔دوسری جانب غزہ کی پٹی کے جنوب میں اسرائیل نے خان یونس شہر پر بم باری کی۔ اس کے نتیجے میں 24 افراد اپنی جانوں سے ہاتھ دھو بیٹھے۔شہری دفاع کے مطابق اس کے کارکنان نے اب تک 14 لاشیں نکال لی ہیں۔ اس سے قبل اسرائیلی فوج نے خان یونس کے جنوبی علاقے المنارہ میں ایک گھر پر میزائل داغا تھا۔

خبر کے مطابق لبنان سے اسرائیل میں حیفا اور قیساریا کی سمت متعدد راکٹ داغے گئے۔ اسرائیلی دفاعی نظام نے ان میں سے کئی راکٹوں کو روک دیا۔ادھر اسرائیلی فوج نے تصدیق کی ہے کہ اس نے حزب اللہ کی رضوان فورس کے فیلڈ کمانڈر کو ہلاک کر دیا ہے۔حزب اللہ نے گذشتہ روز شمالی اسرائیل کی سمت 100 سے زیادہ راکٹ داغے جب کہ سرحدی قصبے عیتا الشعب میں اسرائیلی فوج کے ساتھ شدید جھڑپیں ہوئیں۔