گروگرام میں شارٹ سرکٹ سے ہولناک آتشزدگی
بہار کے مشرقی چمپارن کے رہنے والے 4افراد جاں بحق
گروگرام ،26اکتوبر (ایجنسیز)
گروگرام میں شارٹ سرکٹ کی وجہ سے ایک مکان میں شدید آگ لگ گئی۔ اس حادثہ میں 4 لوگوں کی زندہ جل جانے سے دردناک موت ہو گئی۔یہ تمام مہلوکین صوبہ بہا رکے مشرقی چمپارن یعنی موتیہاری ضلع کے بتائے جاتے ہیں۔ آتشزدگی کی اطلاع ملتے ہی فائر بریگیڈ کی ٹیم موقع پر پہنچی اور گھنٹوں کی سخت مشقت کے بعد آگ پر قابو پایا۔ اس کے بعد چاروں لاشوں کو باہر نکالنے کے بعد اسے پوسٹ مارٹم کے لیے مورچری میں رکھوا دیا گیا۔یہ واقعہ سرسوتی انکلیو کے جی بلاک میں جمعہ کی دیر شب قریب 1 بجے پیش آیا۔ حادثہ کے وقت چاروں لوگ گہری نیند میں سو رہے تھے۔ آگ اتنی شدید تھی کہ چاروں میں سے کوئی بھی گھر سے باہر نہیں آ سکا۔ پولیس نے بتایا کہ حادثہ میں جان گنوانے والے لوگوں کی شناخت کر لی گئی ہے۔ مرنے والوں میں ایک نابالغ بھی شامل ہے۔ وہیں ایک شخص شادی شدہ تھا ۔مہلوکین کی پہچان 28 سالہ محمد مشتاق، 27 سالہ نور عالم، 22 سالہ ساحل اور 17 سالہ امن کے طور پر ہوئی ہے۔چاروں لوگ آپس میں دوست بتائے جاتے ہیں۔ ان لوگوں کا تعلق بہار کے موتیہاری ضلع کے لوکھانا سے تھا۔پوچھ تاچھ میں پتہ چلا ہے کہ محمد مشتاق اور نور عالم گروگرام کی ایک گارمنٹ فیکٹری میں بطور درزی کام کرتے تھے ،جبکہ ساحل 15 دن پہلے ہی دوستوں کے پاس بہار سے گروگرام گھومنے آیا تھا، وہیں امن 10ویں کلاس میں زیر تعلیم تھا۔محکمہ فائر بریگیڈ اور پولیس کی ابتدائی جانچ میں آگ شارٹ سرکٹ سے لگنے کا پتہ چلا ہے۔ پولیس اس معاملہ کی مزید جانچ کر رہی ہے۔ حادثہ کی اطلاع ملتے ہی مہلوکین کے غمزدہ اہل خانہ گرو گرام پہنچ چکے ہیں۔ اس المناک حادثہ کے بعد سرسوتی انکلیو میں سوگ کا ماحول ہے اور ہر کوئی اس حادثے کو لے کر گہرے افسوس کا اظہار کر رہا ہے۔
