پی ایم مودی کشمیر میں 7000 لوگوں کے ساتھ کریں گے یوگا

نئی دہلی ،20جون ( آئی این ایس انڈیا )

وزیر اعظم نریندر مودی بین الاقوامی یوگا ڈے پروگرام میں شرکت کے لیے جمعرات کی شام سری نگر پہنچ رہے ہیں۔ یہ پہلا موقع ہے جب وزیر اعظم نریندر مودی تیسری بار ملک کی کمان سنبھالنے کے بعد کشمیر آ رہے ہیں۔ وزیر اعظم جمعہ کو شیر کشمیر انٹرنیشنل کانفرنس سنٹر میں نوجوانوں کو بااختیار بنانے، جے اینڈ کے کی تبدیلی کے پروگرام میں بھی شرکت کریں گے۔اپنے دورہ کشمیر کے دوران وزیر اعظم نریندر مودی ریاست جموں و کشمیر میں 1500 کروڑ روپے سے زیادہ کے کثیر ترقیاتی منصوبوں کا افتتاح بھی کریں گے۔

وہ 1,800 کروڑ روپے کے زراعت سے متعلق ایک پروجیکٹ کا بھی آغاز کریں گے۔معلومات کے مطابق، وزیر اعظم نریندر مودی 21 جون کو صبح 6.30 بجے سری نگر کے ایس کے آئی سی سی میں 10ویں بین الاقوامی یوگا ڈے پروگرام میں شرکت کریں گے۔ اس دوران وزیر اعظم نریندر مودی پروگرام میں شریک لوگوں سے خطاب بھی کریں گے اور پھر یوگا سیشن میں حصہ لیں گے۔

سری نگر میں سیکورٹی کے خصوصی انتظامات کئے گئے ہیں۔وزیر اعظم نریندر مودی کے دورہ کشمیر سے قبل شہر میں سیکورٹی کے خصوصی انتظامات کیے گئے ہیں۔ جموں و کشمیر پولیس نے سری نگر میں کثیر سطحی حفاظتی انتظامات کیے ہیں۔ وزیر اعظم نریندر مودی جمعہ کو ڈل جھیل کے کنارے سات ہزار لوگوں کے سات یوگا کریں گے۔ عہدیداروں نے بتایا کہ گزشتہ تین دنوں میں پروگرام میں شرکت کے لیے جانے والے لوگوں کو یوگا کے کئی آسن سکھائے گئے ہیں۔

انہوں نے کہا کہ وزیر اعظم کے دورے کے دوران سری نگر میں سب کچھ ٹھیک رہنے کو یقینی بنانے کے لیے پورے شہر میں سیکورٹی فورسز کو تعینات کیا گیا ہے۔ ایس کے آئی سی سی کی طرف جانے والی سڑک کو سیل کر دیا گیا ہے۔ حکام نے بتایا کہ ایس کے آئی سی سی میں صفائی کی کارروائی منگل کو مکمل ہو گئی۔ اس کے علاوہ ایس کے آئی سی سی کے ڈیوٹی پر موجود تمام آفیشلز، سیکیورٹی اہلکاروں اور دیگر افراد اور اس میں حصہ لینے والے کھلاڑیوں کا بیک گراؤنڈ سیکیورٹی چیک کیا گیا ہے۔سری نگر شہر کوعارضی ریڈ زون قرار دیا گیا۔