جب تک بھاجپا ہے، مسلمانوں کو ریزرویشن نہیں ملے گا: امت شاہ

جب تک بھاجپا ہے، مسلمانوں کو ریزرویشن نہیں ملے گا: امت شاہ

پلامو؍رانچی، نومبر (ایجنسیز)

مرکزی وزیر داخلہ امت شاہ نے ہفتہ کو کانگریس لیڈر راہل گاندھی کو مسلمانوں کے لیے ریزرویشن کے حوالے سے خبردار کیا۔جھارکھنڈ کے پلاموں میں ایک ریلی سے خطاب کرتے ہوئے امت شاہ نے سوال کیا کہ اگر مذہب کی بنیاد پر ریزرویشن دیا جائے تو دلتوں اور قبائلیوں کا کیا ہوگا۔ انہوں نے کہا کہ کانگریس پارٹی آپ کا ریزرویشن کا حصہ کاٹ کر مسلمانوں کو دینا چاہتی ہے۔ شاہ نے کہا کہ جب تک بھارتیہ جنتا پارٹی ہندوستان میں ہے، اقلیتوں کو مذہب کی بنیاد پر ریزرویشن نہیں ملے گا۔امیت شاہ نے کہا کہ کانگریس پارٹی ریزرویشن کی بات کرتی ہے۔

انہوں نے کہا کہ آئین میں مذہب کی بنیاد پر ریزرویشن کا کوئی بندوبست نہیں ہے۔ ہم کسی خاص مذہب کو کبھی بھی ریزرویشن نہیں دے سکتے۔ مہاراشٹر میں علماء کے ایک گروپ نے انہیں (کانگریس) کو میمورنڈم دیا کہ مسلمانوں کو 10 فیصد ریزرویشن دیا جائے۔انہوں نے کہا کہ میں جھارکھنڈ کے لوگوں سے پوچھنے آیا ہوں کہ اگر مسلمانوں کو 10 فیصد ریزرویشن ملے گا تو کس کا ریزرویشن کم ہو گا؟ امیت شاہ نے کہا کہ راہل بابا ایس سی-ایس ٹی-او بی سی سے ریزرویشن چھین کر مسلمانوں کو دینا چاہتے ہیں۔ انہوں نے کہا کہ ابھی ابھی مہاراشٹر میں کانگریس کے ریاستی صدر نے کہا، ‘ہم مسلم ریزرویشن دیں گے’۔ کرناٹک میں دیا، حیدرآباد میں دیا۔ لیکن آپ لوگ فکر نہ کریں، جب تک بی جے پی کی حکومت ہے، ہم ایس سی- ایس ٹی -او بی سی ریزرویشن کو ہاتھ نہیں لگانے دیں گے۔

کانگریس کو او بی سی مخالف قرار دیتے ہوئے، شاہ نے کہا کہ ان کی حکمرانی نے او بی سی برادری کو مسلسل نقصان پہنچایا ہے۔انہوں نے 27 فیصد او بی سی ریزرویشن کے نفاذ اور پسماندہ طبقات کے قومی کمیشن (این سی بی سی) کے قیام کو اجاگر کرتے ہوئے وزیر اعظم نریندر مودی کے اقدامات کی ستائش کی۔مرکزی وزیر داخلہ نے کہا کہ کانگریس او بی سی مخالف پارٹی ہے۔ وہ جب بھی اقتدار میں آئے ان کے ساتھ ناانصافی کی۔ کاکا کالیلکر کمیٹی 1950 میں بنائی گئی تھی لیکن اس کی رپورٹ غائب ہو گئی۔

جب منڈل کمیشن او بی سی کو ریزرویشن دینے آیا تو اندرا گاندھی اور راجیو گاندھی نے اس کے نفاذ کی مخالفت کی۔ مرکزی اداروں میں او بی سی کو 27 فیصد ریزرویشن دینے میں انہیں برسوں لگے۔ 2014 میں جب لوگوں نے مودی حکومت کو منتخب کیا تو انہوں نے او بی سی کے لیے 27 فیصد ریزرویشن نافذ کیا۔ انہوں نے نیشنل کمیشن فار بیک ورڈ کلاسز تشکیل دیا اور اسے آئینی درجہ دیا۔ شاہ نے جھارکھنڈ میں جے ایم ایم، کانگریس اور آر جے ڈی اتحاد کو ملک کی سب سے کرپٹ انتظامیہ قرار دیتے ہوئے انڈیا اتحاد پر تنقید کی۔