پچاس ایم ایل اے کو 50-50 کروڑ روپے کی پیشکش
وزیراعلیٰ سدارمیا نے بھاجپا پر ’آپریشن لوٹس‘ کالگایا الزام

 

بنگلور ،14نومبر (ایجنسیز)

 

ریاست کرناٹک میں ایک بار پھر آپریشن لوٹس کی آوازیں سنائی دے رہی ہیں۔ وزیر اعلیٰ سدارمیا نے بھارتیہ جنتا پارٹی (بی جے پی) پر بڑا الزام لگاتے ہوئے کہا کہ، کانگریس کے 50 ایم ایل ایز کو 50 کروڑ روپے کا آفر دے کر خریدنے کی کوشش کی گئی۔انہوں نے کہا کہ آج تک بی جے پی ریاست میں اپنے طور پر کبھی اقتدار میں نہیں آئی ہے۔ آپریشن لوٹس کے ذریعے ہی اقتدار میں آئے۔سی ایم سدارمیا نے الزام لگایا کہ اس بار انہوں نے کانگریس کے 50 اراکین اسمبلی کو 50 کروڑ روپے کا آفر دے کر خریدنے کی کوشش کی۔

یہ پیسہ کہاں سے آتا ہے؟ کیا یدیورپا، بومئی، آر اشوک نے یہ پیسہ چھاپے ہیں؟ یہ وہ پیسہ ہے جس نے ریاست کو لوٹا ہے۔کرناٹک کے وزیر اعلیٰ سدارمیا نے بی جے پی پر سخت حملہ کرتے ہوئے کہاکہ بی جے پی ای ڈی، سی بی آئی، محکمہ انکم ٹیکس اور گورنر کا غلط استعمال کرکے ہمارے خلاف سازش کر رہی ہے۔ پہلے اروند کجریوال کو نشانہ بنایا گیا اور اب مجھے اور میری بیوی کو نشانہ بنایا جا رہا ہے۔ وزیراعلیٰ سدا رمیا نے یہ بیان ٹی نرسی پور اسمبلی حلقہ میں ترقیاتی پروجیکٹوں کے افتتاح کے دوران دیا۔

انہوں نے کہا کہ میں کل یا پرسوں کا وزیر اعلیٰ نہیں ہوں ؛بل کہ 40 سال سے اس عہدے پر کام کر رہا ہوں۔ میرے خلاف جھوٹے مقدمات درج کیے جا رہے ہیں۔ کیا ریاست کے لوگ بے وقوف ہیں؟ عوام کا آشیرواد میرے ساتھ ہے اور میں بی جے پی اور مرکزی حکومت کی سازشوں کے سامنے نہیں جھکوں گا۔بی جے پی نے کانگریس ایم ایل اے کو خریدنے کے لیے 50 کروڑ روپے کی پیشکش کی تھی، لیکن ہمارے ایم ایل اے نے ان کے لالچ کو ٹھکرا دیا۔وزیر اعلیٰ نے یہ بھی کہا کہ بی جے پی اور جے ڈی ایس ریاستی حکومت کی گارنٹی اسکیموں کے متعلق گمراہ کن تشہیر کر رہے ہیں۔