مہاراشٹرامیں مہاوکاس اگھاڑی حکومت بنا رہی ہے: سنجے راؤت

ممبئی ،15نومبر (ایجنسیز ) مہاراشٹر میں اسمبلی انتخابات کے حوالے سے شیوسینا (یو بی ٹی) کے رہنما سنجے راؤت نے پی ایم مودی کو شدید تنقید کا نشانہ بنایا ہے۔انہوں نے کہا کہ مہاراشٹر کی عوام وزیر اعظم کے بیانات پر اعتماد نہیں کرتی اور یہاں مہا وکاس اگھاڑی میں شیو سینا، کانگریس اور این سی پی اتحاد میں مضبوطی سے ساتھ ہیں۔ راؤت نے مزید کہا کہ یہاں کی عوام کو ان سے زیادہ سیکیورٹی کا احساس ہے۔

سنجے راؤت نے وزیر اعظم مودی کی طرف سے اُدھو ٹھاکرے پر کی گئی تنقید کا جواب دیتے ہوئے کہا کہ عوام فیصلہ کرے گی کہ کس کا ریمورٹ کنٹرول کس کے ہاتھ میں ہے۔ انہوں نے یہ بھی واضح کیا کہ ایکناتھ شندے کو دوبارہ وزیر اعلیٰ نہیں بنایا جائے گا اور نہ ہی انہیں اپوزیشن لیڈر کا عہدہ دیا جائے گا، کیونکہ بی جے پی اپنی ضرورت کے لیے شندے اور اجیت پوار کا استعمال کر چکی ہے۔

سنجے راؤت کا کہنا تھا کہ 23 نومبر کو انتخابات کے نتائج کے بعد، مہایُتی کا اتحاد ختم ہو جائے گا ؛کیونکہ اس کے پاس حکومت بنانے کے لیے مطلوبہ اکثریت نہیں ہوگی۔ ان کا کہنا تھا کہ ہم انتخابات کے بعد مہاراشٹر میں حکومت بنائیں گے۔ مہایُتی کو اکثریت ملنے کا کوئی امکان نہیں ہے۔واضح رہے کہ 20 نومبر کو مہاراشٹر میں تمام 288 اسمبلی نشستوں پر ایک ہی دن انتخابات ہوں گے اور 23 نومبر کو نتائج کا اعلان کیا جائے گا۔