نتیش کمار کی پھر یقین دہانی ، ’ آپ سے ہم جدا نہیں ہوں گے !‘

نتیش کمار کی پھر یقین دہانی ، ’ آپ سے ہم جدا نہیں ہوں گے !

جموئی؍پٹنہ ،15نومبر (ایجنسیز)

بہار کے وزیر اعلیٰ نتیش کمار نے جمعہ کو ایک عوامی تقریب(آدی باسی گورو دیوس) میں پی ایم مودی کو ایک بار پھر یہ یقین دہانی کرائی کہ ان کی پارٹی اب کبھی اِدھر اُدھر نہیں جائے گی اور وہ ہمیشہ بی جے پی کے ساتھ رہیں گے۔ اس موقع پر وزیر اعظم مودی مسکراتے ہوئے نتیش کمار کی باتیں سن رہے تھے۔وزیر اعظم مودی جمعہ کو بہار کے جموئی پہنچے ،جہاں انہوں نے آزادی پسند اور عظیم آدی باسی ہستی برسا منڈا کی 150 ویں سالگرہ کے موقع پر منعقدہ ’آدی باسی گورو دیوس‘ کے نام سے منعقدہ تقریب میں شرکت کی۔

اس موقع پر پی ایم مودی نے 6640 کروڑ روپے سے زیادہ کے ترقیاتی منصوبوں کا افتتاح کیا اور سنگ بنیاد رکھا۔وزیر اعلیٰ نتیش کمار اس تقریب میں وزیر اعظم مودی کے ہمراہ موجود تھے اور انہوں نے عوام کو خطاب کرتے ہوئے وزیر اعظم کا خیرمقدم کیا اور کہا کہ ان کی پارٹی ہمیشہ بی جے پی کے ساتھ رہے گی۔نتیش کمار نے مزید کہاکہ بیچ میں کچھ غلطیاں ہوئیں، کچھ لوگوں نے غلط کام کیا ،تاہم ہم نے طے کر لیا ہے کہ اب ہم کبھی ادھر ادھر نہیں جائیں گے۔

ہم ہمیشہ اٹل بہاری واجپئی کے ساتھ تھے اور اب ہم بی جے پی کے ساتھ رہیں گے۔انہوں نے پی ایم مودی کی تعریف کرتے ہوئے کہا کہ مودی پورے ملک کے لیے کام کر رہے ہیں اور بہار کے لیے بھی انہوں نے بہت کچھ کیا ہے۔ انہوں نے کہاکہ وزیر اعظم جہاں بھی جاتے ہیں، وہاں کچھ نہ کچھ ترقیاتی کام ضرور ہوتا ہے۔

ان کا خیرمقدم کیا جاتا ہے اور ان کے کام کی ہم تعریف کرتے ہیں۔قابل ذکر ہے کہ نتیش کمار کی پارٹی جے ڈی یو، این ڈی اے میں شامل ہونے سے پہلے مہاگٹھ بندھن کا حصہ تھی؛ لیکن اب وہ این ڈی اے میں شامل ہو چکی ہے۔ چنانچہ نتیش کمار بار بار عوامی سطح پر یہ یقین دہانی کراتے ہیں کہ ان کی پارٹی اب کبھی بھی مہاگٹھ بندھن کے ساتھ نہیں جائے گی۔