عشق کی فقیدالمثال یادگار تاج محل کو ملی بم سے اڑانے کی دھمکی

آگرہ ،3 دسمبر (ایجنسیز) آگرہ کے تاج محل کو بم کی دھمکی ملی ہے۔ جس کی وجہ سے محکمہ پولیس میں ہلچل مچ گئی ہے۔ بتایا جا رہا ہے کہ ایک نامعلوم شخص نے میل کے ذریعے تاج محل کو اڑانے کی دھمکی دی، جس کے بعد انتظامیہ فوراً حرکت میں آئی۔اے سی پی تاج سکیورٹی سعید اریب احمد نے اس حوالے سے بتایا ہے کہ محکمہ سیاحت کو ای میل موصول ہوئی تھی۔ اس بنیاد پر تاج گنج پولس تھانے میں مقدمہ درج کیا گیا ہے۔

تفتیش ابھی جاری ہے۔ سعید احمد نے یہاں تک کہا کہ ای میل کے مطابق ابھی تک ایسا کوئی ان پٹ نہیں ملا۔ لیکن سکیورٹی کو مدنظر رکھتے ہوئے بم ڈسپوزل اسکواڈ، سرچ ڈاگ اور دیگر ٹیمیں موقع پر پہنچ گئی ہیں۔یوپی ٹورازم کی ڈپٹی ڈائریکٹر دیپتی وتس نے کہا کہ مشتبہ ای میل آگرہ پولیس کو بھیجا گیا ہے، اسی بنیاد پر ایف آئی آر بھی درج کی گئی ہے۔

اب یہ پہلی بار نہیں ہے کہ تاج محل کو ایسی دھمکیاں ملی ہوں، شرپسند عناصر ایسی حرکتیں کرتے رہتے ہیں۔ اب تفتیش جاری ہے کہ یہ دھمکی کس نے بھیجی ہے۔اس وقت کئی طیاروں کو بم کی دھمکیاں بھی مل رہی ہیں۔ زیادہ تر معاملات میں،وہ دھمکیاں مکمل طور پر جعلی ہوتی ہیں اور ایک ہی ای میل آئی ڈی سے بھیجی جاتی ہیں۔

اس لیے خیال کیا جا رہا ہے کہ ایک طرف ایسی دھمکیاں ایک بڑی سازش کے تحت دی جا رہی ہیں، ایوی ایشن سیکٹر کو بدنام کرنے کی کوشش کی جا رہی ہے تو دوسری طرف لوگوں میں خوف و ہراس پھیلانے کی کوشش کی جا رہی ہے۔