جنوبی کوریا میں مارشل لا نافذ کردیا گیا .

جنوبی کوریا ،3دسمبر( ایجنسیز) جنوبی کوریا کے صدر یون سک یول نے ملک میں ‘ایمرجنسی مارشل لا’ نافذ کر دیا ہے۔صدر یون نے منگل کو ٹیلی ویژن پر مارشل لا کے نفاذ کا اعلان کرتے ہوئے کہا کہ ان کے پاس آئین کے تحفظ کے لیے اس طرح کا قدم اٹھانے کے سوا کوئی چارہ نہیں تھا۔انہوں نے خطاب میں ملک کی اپوزیشن پر پارلیمنٹ کو کنٹرول کرنے، شمالی کوریا کے ساتھ ہمدردی رکھنے اور ریاست مخالف سرگرمیوں سے حکومت کو مفلوج کرنے کا الزام بھی لگایا۔

انہوں نے کہا کہ اپوزیشن جماعتوں نے ملک کو بحران میں ڈالنے کے لیے پارلیمانی عمل کو یرغمال بنا لیا ہے۔جنوبی کوریا کے صدر کے مطابق انہوں نے آزاد جمہوریہ کوریا کو شمالی کوریا کی کمیونسٹ قوتوں کے خطرے سے بچانے، شمالی کوریا کی حامی ریاست مخالف قوتوں کو ختم کرنے اور آزاد آئین کے تحفظ کے لیے مارشل لا نافذ کیا۔

جنوبی کوریا کے صدر کے اس اعلان کے بعد ابھی فوری طور پر یہ واضح نہیں ہے کہ کس طرح کے اقدامات کیے جائیں گے اور ان کا ملک کی حکومت اور جمہوریت پر کیا اثر پڑے گا۔یون کے اعلان کے فوری بعد پارلیمنٹ میں اکثریت رکھنے والی اپوزیشن جماعت ڈیمو کریٹک پارٹی نے اپنے قانون سازوں کا ایک ہنگامی اجلاس طلب کر لیا ہے۔
#Martiallaw, #imposed, #SouthKorea,