مہاراشٹر کے نئے وزیر اعلیٰ نام آیا سامنے ،فڑنویس سنبھالیں گے عہدہ

ممبئی ،4دسمبر (ایجنسیز) بی جے پی لیڈر دیویندر فڑنویس مہاراشٹر کے اگلے وزیر اعلیٰ ہوں گے۔ دیویندر فڑنویس کے نام کو منظوری دے دی گئی ہے۔ بدھ کو دیویندر فڑنویس کو بی جے پی لیجسلیچر پارٹی کا لیڈر منتخب کیا گیا۔ جبکہ ایکناتھ شندے اور اجیت پوار کو مہاراشٹر کا نائب وزیر اعلیٰ بنانے پر اتفاق کیا گیا ہے۔ اس فیصلے کے بعد اب دیویندر فڑنویس حمایتی ایم ایل ایز کے ناموں کے ساتھ مہاراشٹر کے گورنر سے ملاقات کریں گے اور حکومت بنانے کا دعویٰ پیش کریں گے۔

دوپہر 3.30 بجے مہاوتی لیڈر راج بھون جائیں گے۔ مہاراشٹر میں 5 دسمبر کو آزاد میدان میں حلف برداری کا پروگرام منعقد کیا جانا ہے۔ اس میں بی جے پی کے کئی سینئر لیڈر موجود رہیں گے۔ اسمبلی انتخابات میں جس طرح سے بی جے پی کو سیٹیں ملی ہیں، اس سے یہ مانا جا رہا تھا کہ اگلا وزیر اعلیٰ بی جے پی کا ہی ہوگا۔ دیویندر فڑنویس ناگپور ساؤتھ ویسٹ سیٹ سے منتخب ہوئے ہیں۔وہ ماضی میں بھی وزیراعلیٰ رہ چکے ہیں۔ دیویندر فڑنویس، جو ایک ناتھ شندے حکومت میں نائب وزیر اعلیٰ کے عہدے پر فائز تھے، کو 2019 میں بھی وزیر اعلیٰ بننے کا موقع ملا، لیکن انہیں کچھ ہی دنوں بعد استعفیٰ دینا پڑا۔

مہاراشٹر اسمبلی انتخابات کے نتائج کافی چونکا دینے والے رہے ہیں۔ یہاں مہا یوتی ایک بار پھر نہ صرف اقتدار میں آئی بلکہ 288 رکنی اسمبلی میں 230 سیٹیں جیتی، جب کہ اپوزیشن مہا وکاس اگھاڑی صرف 50 تک محدود رہی۔بی جے پی انتخابات میں سب سے بڑی پارٹی بن کر ابھری۔

بی جے پی نے 132، ایکناتھ شندے کی شیوسینا نے 57 اور اجیت پوار کی این سی پی نے 41 سیٹوں پر کامیابی حاصل کی ہے۔ بی جے پی کو پانچ آزاد ایم ایل ایز کی حمایت بھی حاصل ہے۔ دوسری طرف مہا وکاس اگھاڑی کی کارکردگی بہت مایوس کن رہی۔ انتخابات میں اس کے دعوے کے برعکس کانگریس نے صرف 16 سیٹیں جیتیں، شرد پوار کی این سی پی-ایس پی نے 10 اور ادھو ٹھاکرے کی شیو سینا نے 20 سیٹیں جیتیں۔