ہاشم پورہ قتل عام کیس میں 8مجرموں کوملی ضمانت

نئی دہلی،6دسمبر (ایجنسیز) سپریم کورٹ نے 1987 کے ہاشم پورہ قتل عام کیس میں آٹھ لوگوں کو ضمانت دے دی۔ جب کہ اس کے علاوہ، دوسرے کیس3,600 کروڑ روپے کے آگسٹا ویسٹ لینڈ گھوٹالہ معاملے میں، عدالت نے جمعہ کو مبینہ ثالث کرسچن مشیل جیمز کی طرف سے دائر ضمانت کی درخواست پر سی بی آئی سے جواب طلب کیا۔سپریم کورٹ نے جمعہ کو 1987 میں ٹیریٹوریل آرمڈ کانسٹیبلری (پی اے سی) کے اہلکاروں کے ذریعہ 38 لوگوں کے قتل سے متعلق ہاشم پورہ قتل عام کیس میں آٹھ مجرموں کو ضمانت دے دی۔

جسٹس ابھے اوکا اور جسٹس آگسٹین جارج مسیح کی بنچ نے چاروں مجرموں کی طرف سے پیش ہونے والے سینئر وکیل امت آنند تیواری کی عرضیوں کا نوٹس لیا کہ دہلی ہائی کورٹ کی جانب سے ٹرائل کورٹ کی بریت کے فیصلے کے بعد وہ طویل عرصے سے جیل میں ہیں۔ہاشم پورہ قتل عام 22 مئی 1987 کو ہوا تھا، جب پی اے سی کی 41ویں بٹالین کی سی-کمپنی کے سپاہیوں نے فرقہ وارانہ کشیدگی کے دوران مبینہ طور پر اتر پردیش میں میرٹھ کے ہاشم پورہ علاقے سے تقریباً 50 مسلم مردوں کو پکڑ کرشہر کے مضافات میں لے جایا گیا، جہاں انہیں قطار میں کھڑا کرکے گولیاں مار کر ان کی لاشیں ایک نہر میں پھینک دی گئیں۔

اس واقعے میں 38 لوگ مارے گئے اور صرف پانچ لوگ ہی اس ہولناک واقعے کو بیان کرنے کے لیے زندہ بچ سکے۔عرضی گزار سمیع اللہ، نرنجن لال، مہیش پرساد اور جے پال سنگھ کی نمائندگی کرنے والے سینئر وکیل تیواری نے جمعہ کو دلیل دی کہ ہائی کورٹ کے فیصلے کے بعد سے اپیل کنندگان چھ سال سے زیادہ عرصے سے جیل میں ہیں۔ انہوں نے کہا کہ اپیل کنندگان کو ماتحت عدالت پہلے بری کر چکی ہے اور ماتحت عدالت میں ٹرائل اور اپیل کے عمل کے دوران ان کا طرز عمل اچھا رہا ہے۔

دوسری طرف سپریم کورٹ نے 3,600 کروڑ روپے کے آگسٹا ویسٹ لینڈ گھوٹالے میں مبینہ درمیانی کرسچن مشیل جیمز کی طرف سے دائر ضمانت کی عرضی پر جمعہ کو سی بی آئی سے جواب طلب کیا۔جسٹس وکرم ناتھ اور جسٹس پی بی ورلے کی بنچ نے مرکزی تفتیشی بیورو (سی بی آئی) کو نوٹس جاری کرتے ہوئے چار ہفتوں کے اندر اس درخواست پر جواب طلب کیا ہے۔

جیمز نے دہلی ہائی کورٹ کے 25 ستمبر کے حکم کو چیلنج کرتے ہوئے سپریم کورٹ کا رخ کیا ہے۔ اس معاملے میں ان کی ضمانت سے انکار کر دیا گیا تھا۔ مبینہ گھوٹالہ آگسٹا ویسٹ لینڈ سے 12 وی وی آئی پی ہیلی کاپٹروں کی خریداری سے متعلق ہے۔ برطانوی شہری جیمز کو دسمبر 2018 میں دبئی سے حوالگی اور بعد میں گرفتار کیا گیا تھا۔