دن رات دل کو زخم دے نشتر لگائے جو

غزل

دن رات دل کو زخم دے نشتر لگائے جو
میرا حبیب وہ ہے کہ مجھ کو رلائے جو

شہرِ وجود ہے ترا یا ہے جہانِ کل
اک تجربہ نیا مجھے ہر دن کرائے جو

بد قسمتی سے مجھ کو محبت ہے ایسے سے
کر نے کے بعد وعدہ نبھا ہی نہ پائے جو

اب ایک ایسے یار کی کرتا ہوں میں تلاش
مجھ سے ملے بغیر بہت چھٹپٹائے جو

افسوس اس کی آنکھ سمندر ہے اشکوں کا
دنیا میں سب کے ہونٹوں کو ہنسنا سکھائے جو

سکھ چین کیا حیات ہی میں اس پہ وار دوں
ہر حال میں کلیجے سے اپنے لگائے جو

اک ایسا بے وفا ہے مرے ذہن میں بسا
کوشش کے باوجود بھلایا نہ جائے جو

وہ حسنِ بے پناہ مرا جانِ عشق ہے
مجھ کو تخیلات کی وادی میں لائے جو

 

ذکی طارق بارہ بنکوی
سعادتگنج، بارہ بنکی، یوپی انڈیا