سنبھل میں وقف اراضی پر پولیس چوکی کی تعمیر، اویسی نے سی ایم یوگی کو بنایا نشانہ

سنبھل میں وقف اراضی پر پولیس چوکی کی تعمیر، اویسی نے سی ایم یوگی کو بنایا نشانہ

نئی دہلی ،31دسمبر (ایجنسیز)

یوپی کے سنبھل میں جامع مسجد کے سامنے بن رہی پولیس چوکی کا ہر طرف چرچا ہو رہی ہے۔ معاملے کو لے کر وبال بھی مچا ہوا ہے۔تازہ ترین پیشرفت میں، آل انڈیا مجلس اتحاد المسلمین (اے آئی ایم آئی ایم) کے سربراہ اسد الدین اویسی نے منگل (31 دسمبر 2024) کو وزیر اعظم نریندر مودی اور وزیر اعلیٰ یوگی آدتیہ ناتھ پر حملہ کرتے ہوئے کہا کہ جس جگہ پر پولیس چوکی بنائی جا رہی ہے وہ وقف کی زمین ہے اور ماحول خراب کرنے کے لیے وزیر اعظم اور وزیر اعلی ذمہ دار ہیں۔سوشل میڈیا پلیٹ فارم ایکس پر ثبوت پیش کرتے ہوئے انہوں نے لکھا، ’’سنبھل کی جامع مسجد کے قریب جو پولیس چوکی بنائی جا رہی ہے وہ وقف کی زمین پر ہے۔

جیسا کہ ریکارڈ میں درج ہے۔ اس کے علاوہ، قدیم یادگاروں کے قانون کے تحت محفوظ یادگاروں کے قریب تعمیراتی کام ممنوع ہے۔نریندر مودی اور یوگی آدتیہ ناتھ سنبھل میں خطرناک ماحول پیدا کرنے کے ذمہ دار ہیں۔اراضی کے کاغزات کی تصویر پوسٹ کرتے ہوئے انہوں نے مزید کہاکہ یہ وقف نمبر 39-اے، مراد آباد ہے۔ یہ اس زمین کا وقف نامہ ہے جس پر پولیس چوکی بنائی جا رہی ہے۔

اتر پردیش حکومت کو قانون کا کوئی احترام نہیں ہے۔اس سے قبل سنیچر (28 دسمبر 2024) کو سنبھل میں جامع مسجد کے سامنے والی زمین پر پولیس چوکی کی تعمیر کے لیے بھومی پوجن کی گئی تھی۔ سنبھل کے اے ایس پی شریش چندر نے بتایا کہ سیکورٹی انتظامات کو مدنظر رکھتے ہوئے پولیس چوکی بنائی جا رہی ہے۔ اے ایس پی شریش چندرا نے کہا کہ پولیس اہلکاروں کے لیے بھی قریب ہی رہائشی انتظامات کیے جائیں گے۔خیال رہے کہ بھومی پوجن مکمل ہو چکا ہے۔