اگلے ہفتے اسمبلی انتخابات کی تاریخوں کا اعلان متوقع

نئی دہلی،3جنوری (ایجنسیز) دہلی اسمبلی انتخابات کو لے کر سیاست زوروں پر ہے۔ ذرائع کے مطابق مرکزی الیکشن کمیشن 7 یا 8 جنوری کو دہلی انتخابات کی تاریخوں کا اعلان کرسکتا ہے۔ نیز یہ بتایا جا رہا ہے کہ دہلی میں فروری کے دوسرے ہفتے میں انتخابات ہوں گے اور نتائج 15 فروری کے بعد آئیں گے۔ذرائع کے مطابق دہلی میں 11 سے 13 فروری کے درمیان ایک ہی مرحلے میں ووٹنگ ختم ہو جائے گی۔

ووٹوں کی گنتی 15 یا 16 فروری کو ہو سکتی ہے۔ یعنی ایک طرح سے دہلی اسمبلی انتخابات کے لیے مرکزی الیکشن کمیشن کی تیاریاں تقریباً آخری مرحلے میں پہنچ چکی ہیں۔ مرکزی الیکشن کمیشن دہلی میں نئی ??ووٹر لسٹ بھی 6 جنوری تک جاری کرے گا۔ یعنی اس لحاظ سے دہلی میں نئی حکومت کی تشکیل کی تصویر فروری کے تیسرے ہفتے تک واضح ہو سکتی ہے۔

دہلی اسمبلی انتخابات جیتنے کے مقصد سے عام آدمی پارٹی، بی جے پی اور کانگریس کے درمیان الزامات اور جوابی الزامات کا دور شروع ہو گیا ہے۔ اس کے ساتھ ہی تمام جماعتوں نے عوام سے مختلف وعدے بھی شروع کر دیے ہیں۔