پرینکا گاندھی کیخلاف اہانت آمیز بیان پربھاجپاامیدوار رمیش بدھوڑی نے مانگی معافی

نئی دہلی،5جنوری (آئی این ایس انڈیا )

راجدھانی دہلی میں سیاسی سرگرمیاں عروج پر ہیں۔ بی جے پی کے سابق ایم پی رمیش بدھوڑی کانگریس ایم پی پرینکا گاندھی کے خلاف قابل اعتراض بیان دینے پر مشکل میں پھنس گئے۔ دہلی کے کالکاجی سے بی جے پی کے امیدوار رمیش بدھوڑی نے اتوار کو ایک بڑا تنازعہ کھڑا کر دیا جب انہوں نے کہا کہ اگر وہ آئندہ انتخابات جیت گئے تو وہ اپنے اسمبلی حلقے کی سڑکوں کو کانگریس لیڈر پرینکا گاندھی کے گالوں کی طرح چمکادیں گے۔ان کے بیان پر سخت ردعمل کا اظہار کرتے ہوئے کانگریس لیڈروں نے بی جے پی پر خواتین مخالف ذہنیت رکھنے کا الزام لگایا، کانگریس لیڈر نے بدھوڑی کے خلاف قومی کمیشن برائے خواتین میں شکایت درج کرائی ہے۔

ویڈیو میں بدھوڑی کو یہ کہتے ہوئے سنا جا سکتا ہے کہ لالو یادو نے ایک بار دعویٰ کیا تھا کہ وہ بہار کی سڑکوں کو ہیما مالنی کے گالوں کی طرح چمکائیں گے، لیکن وہ اس وعدے کو پورا کرنے میں ناکام رہے۔ تاہم میں یقین دلاتا ہوں کہ جس طرح ہم نے اوکھلا اور سنگم وہار کی سڑکوں کو بدلا ہے، اسی طرح ہم کالکاجی کی ہر سڑک کو پرینکا گاندھی کے گالوں کی طرح چمکادیں گے۔کانگریس لیڈر سپریا شرینیت نے کہا کہ بی جے پی انتہائی خواتین مخالف ہے۔

پرینکا گاندھی کے حوالے سے رمیش بدھوڑی کا بیان نہ صرف شرمناک ہے بلکہ خواتین کے تئیں ان کی نفرت انگیز ذہنیت کو ظاہر کرتا ہے، لیکن ایک ایسے شخص سے اور کیا توقع کی جا سکتی ہے جس نے ایوان میں اپنے ساتھی رکن پارلیامنٹ کے ساتھ بدسلوکی کی ہو اور اسے کوئی سزا نہ ملی ہو۔ یہ ہے بی جے پی کا اصلی چہرہ۔ تاہم معاملہ کی سنجیدگی کو دیکھتے ہوئے بدھوڑی نے اپنے اس اہانت آمیز بیان پر معافی مانگ لی ہے، بدھوڑی کا کہنا تھا کہ میرا مقصد کسی کو تکلیف پہنچانا نہیں تھا۔