سیف علی خان پر قاتلانہ حملہ کرنے والے حملہ آور کی پہلی تصویر منظر عام پر

سیف علی خان پر قاتلانہ حملہ کرنے والے حملہ آور کی پہلی تصویر منظر عام پر

ممبئی، 16جنوری (ایجنسیز)

بالی ووڈکے نواب کہے جانے والے اداکاہ سیف علی خان پر قاتلانہ حملے کے معاملے میں پولیس نے بڑی کارروائی کرتے ہوئے مشتبہ حملہ آور کی پہلی تصویر جاری کیہے۔ یہ تصویر سی سی ٹی وی فوٹیج سے لی گئی ہے، جس میں حملہ آور کو صبح 2:33 بجے سیف کے اپارٹمنٹ کے قریب دیکھا گیا۔ پولیس نے اس تصویر کو عام کیا گیا ہے اور لوگوں سے اپیل کی ہے کہ اگر کسی کو اس مشتبہ شخص کے بارے میں کوئی معلومات ہو تو فوری طور پر پولیس کو اطلاع دیں۔پولیس کو یہ فوٹیج سیف علی خان کے کھر میں واقع اپارٹمنٹ فارچیون ہائٹس کے ارد گرد لگے سی سی ٹی وی کیمروں کی چھان بین کے دوران ملی۔ فوٹیج میں حملہ آور کو اپنا چہرہ ڈھانپے اور تیزی سے فرار ہوتے ہوئے دیکھا گیا۔ پولیس کا خیال ہے کہ حملہ آور علاقے کے جغرافیائی محل وقوع سے واقف تھا جس کی وجہ سے وہ آسانی سے فرار ہونے میں کامیاب ہو گیا۔سیف علی خان پر بدھ کی دیر رات چاقو سے قاتلانہ حملہ کیا گیا، جس میں ان کی گردن، کمر اور ہاتھ پر شدید چوٹیں آئیں۔ انہیں فوری طور پر لیلاوتی اسپتال میں داخل کرایا گیا، جہاں ڈاکٹروں نے ان کی سرجری کی۔ ان کی حالت اب مستحکم بتائی جاتی ہے۔ اس حملے کے دوران بچوں کے کمرے میں موجود سیف کا گھریلو ملازم بھی زخمی ہو گیا۔اس معاملے کو سنجیدگی سے لیتے ہوئے ممبئی پولیس نے کرائم برانچ کی 8 ٹیمیں اور باندرہ پولیس کی 7 ٹیمیں تشکیل دی ہیں۔ تفتیش سے معلوم ہوا ہے کہ حملہ آور کسی کی مدد سے سیف کے اپارٹمنٹ میں داخل ہوا تھا کیونکہ گھر کے دروازے پر طاقت کا کوئی نشان نہیں تھا۔ پولیس اب اس بات کی تفتیش کر رہی ہے کہ گھر کے اندر وہ شخص کون تھا جس نے حملہ آور کو اندر آنے کے لیے راہ ہموار کی۔حملہ آور کی تصویر جاری کرنے کے ساتھ، پولیس نے عام لوگوں سے مشتبہ شخص کی شناخت یا اس کے بارے میں معلومات فراہم کرنے میں مدد کرنے کی اپیل کی ہے۔ سوشل میڈیا پر لوگ سیف علی خان کی سیکورٹی کے بارے میں اپنی تشویش کا اظہار کر رہے ہیں اور حملہ آور کی جلد از جلد گرفتاری کا مطالبہ کر رہے ہیں۔