ترکیہ میں سکائی ریزورٹ ہوٹل میں آگ لگنے سے کم از کم66 افراد ہلاک اور51 زخمی ہو گئے۔

ترکیہ،21جنوری( ایجنسیز)

12 منزلہ گرینڈ کارٹل ہوٹل میں تقریباً 3.30 بجے آگ لگنے کے بعد لوگوں کی کھڑکیوں سے چھلانگ لگانے اور چڑھنے کی اطلاعات

ترکیہ کے وزیر داخلہ نے بتایا کہ منگل کو شمال مغربی ترکیہ میں ایک مشہور سکائی ریزورٹ میں ایک ہوٹل میں آگ لگنے سے کم از کم 66 افراد ہلاک ہو گئے۔اطلاعات کے مطابق کم از کم 51 دیگر افراد زخمی ہوئے ہیں۔
ترکیہ کے وزیر داخلہ علی یرلیکایانے بتایا کہ ہم گہرے درد میں ہیں۔ ہم بدقسمتی سے اس ہوٹل میں لگنے والی آگ میں 66 جانیں گنوا چکے ہیں، یرلیکایا نے جائے وقوعہ کا معائنہ کرنے کے بعد صحافیوں کو بتایا۔

وزیر صحت کمال میمی اولو نے کہا کہ زخمیوں میں سے کم از کم ایک کی حالت تشویشناک ہے۔حکام اور رپورٹس کے مطابق، آگ لگ بھگ 3.30 بجے بولو صوبے میں کارتالکیا کے ریزورٹ میں واقع 12 منزلہ گرینڈ کارٹل ہوٹل کے ریستوران میں لگی۔ آگ لگنے کی وجہ کی تفتیش جاری ہے۔

بولو کے گورنر عبدالعزیز آیدین نے سرکاری انادولو ایجنسی کو بتایا کہ متاثرین میں سے دو گھبراہٹ میں عمارت سے چھلانگ لگانے کے بعد ہلاک ہوئے۔ این ٹی وی ٹیلی ویژن نے کہا کہ کچھ لوگوں نے چادریں اور کمبل استعمال کرتے ہوئے اپنے کمروں سے نیچے اترنے کی کوشش کی۔ ہوٹل میں 234 مہمان ٹھہرے ہوئے تھے۔

ہوٹل کے سکی انسٹرکٹر نیکمی کیپسیٹوٹن نے بتایا کہ جب آگ لگی تو وہ سو رہے تھے اور وہ عمارت سے باہر نکل آئے۔ اس کے بعد اس نے تقریباً 20 مہمانوں کو ہوٹل سے باہر نکالنے میں مدد کی۔

انہوں نے کہا کہ ہوٹل دھویں میں لپٹا ہوا تھا جس کی وجہ سے مہمانوں کے لیے آگ سے بچنے کا پتہ لگانا مشکل ہو رہا تھا۔میں اپنے کچھ طلباء تک نہیں پہنچ سکتا۔ مجھے امید ہے کہ وہ ٹھیک ہیں۔

NTV نے دھوئیں سے بھری کالی لابی دکھائی، اس کے شیشے کے دروازے اور کھڑکیاں ٹوٹی ہوئی تھیں، اس کا لکڑی کا استقبالیہ ڈیسک جل گیا تھا اور زمین پر ایک فانوس تھا۔

کارتالکیا استنبول کے مشرق میں تقریباً 185 میل (300 کلومیٹر) کے فاصلے پر کوروگلو پہاڑوں میں ایک مشہور سکی ریزورٹ ہے۔ آگ اسکول کے سمسٹر کے وقفے کے دوران اس وقت لگی جب علاقے کے ہوٹل بھرے ہوئےتھے۔