وی وی آئی پی لوگوں کو کمبھ جیسے پروگراموں سے پرہیزکرنا چاہئے: ششی تھرور

نئی دہلی،3فروری (ایجنسیز) کانگریس کے رکن پارلیمنٹ ڈاکٹر ششی تھرور نے اتوار کو دعوی کیا کہ وی وی آئی پی کو کمبھ جیسے پروگراموں میں شرکت نہیں کرنی چاہئے۔ جے پور میں ایک پریس کانفرنس سے خطاب کرتے ہوئے انہوں نے کہا کہ وہ وی وی آئی پی سہولیات حاصل کر سکتے تھے لیکن انہوں نے انکار کر دیا۔

ششی تھرور نے کہاکہ میرا ایک دوست جو حکومت میں وزیر ہے، اس نے مجھے کمبھ آنے کی پیشکش کی تھی۔ میں وی وی آئی پی سہولیات حاصل کر سکتا تھا، لیکن میں نے اس پیشکش کو قبول کرنے سے انکار کر دیا، آپ نے کمبھ کا حالیہ دورہ دیکھا ہوگا۔

کمبھ میلے میں ہونے والے واقعات سے آگاہ ہونا چاہیے جس میں بہت سے لوگوں کی جانیں گئی ہیں، میرا ماننا ہے کہ کمبھ جیسے پروگراموں کا انعقاد عام آدمی کے لیے ہونا چاہیے اور عام لوگوں کو تکلیف سے بچنے کے لیے وی وی آئی پیز کو ان میں شرکت نہیں کرنی چاہیے۔کانگریس لیڈر نے یکم فروری کو پیش کیے گئے مرکزی بجٹ پر بھی اپنا ردعمل دیا۔

انہوں نے کہاکہ میں سمجھتا ہوں کہ درمیانی طبقہ مرکزی بجٹ سے خوش ہے، لیکن اگر آپ ایسے شخص ہیں جس کی تنخواہ ایک لاکھ روپے ماہانہ نہیں ہے یا آپ یوپی یا بہار سے نہیں ہیں، تو آپ اس سے کیوں خوش ہیں؟ ششی تھرور نے کہاکہ انکم ٹیکس بل ابھی آنا ہے، ہم نے ابھی تک اس بل کا مسودہ نہیں دیکھا ہے۔