معروف سیاستداں بابا صدیقی قتل کیس میں بڑا انکشاف

ممبئی ،3فروری (ایجنسیز)معروف سیاستداں بابا صدیقی قتل کیس سے متعلق نیا راز سامنے آگیا۔ بابا صدیقی کے قتل کی منصوبہ بندی کا فائنل راونڈ نوی ممبئی کے ایک ہوٹل میں منعقد ہوا۔ انمول بشنوئی بھی ویڈیو کال کے ذریعے اس میٹنگ سے جڑے تھے۔ این سی پی لیڈر بابا صدیقی قتل کیس میں ممبئی کرائم برانچ کی طرف سے داخل کی گئی چارج شیٹ میں یہ بڑا انکشاف ہوا ہے۔

بابا صدیقی کے قتل کی منصوبہ بندی کے لیے آخری میٹنگ اگست 2024 میں نئی ممبئی کے کالمبولی کے ایک ہوٹل میں ہوئی تھی۔ انمول بشنوئی بھی پرتگال سے ویڈیو کال کے ذریعے اس میٹنگ سے جڑے تھے۔ چارج شیٹ کے مطابق ملزم رام کنوجیا نے اپنے بیان میں کہا ہے کہ اس میٹنگ میں شبھم لونکر، نتن سپرے، رام کنوجیا اور دیگر ملزمین بھی موجود تھے۔ ملاقات کے دوران انمول نے واضح ہدایات دی تھیں کہ بابا صدیقی کو کسی بھی قیمت پر قتل کیا جائے۔

وہیں اس معاملے کے ایک اور ملزم ہریش کمار نشاد نے بھی اپنے بیان میں کئی انکشافات کیے ہیں۔ چارج شیٹ میں درج ہریش کمار کے بیان کے مطابق، اسے مطلوب ملزم شوبھم لونکر نے سازش میں شامل کیا تھا، جس نے اسے گینگسٹر انمول بشنوئی کی جانب سے 10 لاکھ روپے دینے کا وعدہ کیا تھا۔ نشاد کا خیال تھا کہ اس رقم سے پونے میں اپنے اسکریپ کے کاروبار کو بڑھانے میں بہت مدد ملے گی۔ نشاد نے مزید دعویٰ کیا کہ چونکہ اصل شوٹنگ شیوا، گرمل اور دھرم راج کو کرنی تھی، اس لیے اس نے سوچا کہ وہ قتل میں براہ راست ملوث نہیں ہوں گے۔

ملزم قتل کے بعد فرار ہوگیا، اسے اس کے گاؤں سے واردات کا علم ہوا۔ سازش رچنے کے بعد نشاد اپنی دکان بند کر کے اپنے گاؤں بھاگ گیا۔ یہیں سے اسے بابا صدیقی کے قتل کا علم ہوا، جسے تین شوٹروں نے انجام دیا۔وہیں ملزم ہریش کمار نے بھی اپنے بیان میں کہا ہے کہ قتل سے پہلے شوٹروں نے جو موبائل فون استعمال کیے تھے وہ پونے کے وارجے علاقے سے خریدے گئے تھے۔ ہریش کمار نے اعتراف کیا کہ انہوں نے جعلی شناختی کارڈ کا استعمال کرتے ہوئے دکاندار کے سامنے اپنا تعارف راہل کشیپ کے طور پر کرایا تھا۔ ریکی کے لیے استعمال ہونے والی بائک بھی پونے سے 34000 روپے میں خریدی گئیں۔