امریکہ سے غیرقانونی ہندوستانی مہاجرین کی امریکہ بدری: ہماری توجہ غیر قانونی امیگریشن انڈسٹری کیخلاف سخت کارروائی کرنے پر:جے شنکر

امریکہ سے غیرقانونی ہندوستانی مہاجرین کی امریکہ بدری:
ہماری توجہ غیر قانونی امیگریشن انڈسٹری کیخلاف سخت کارروائی کرنے پر:جے شنکر

نئی دہلی،7فروری (ایجنسیز)

امریکہ میں غیر قانونی طور پر مقیم امریکہ بدر کئے گئے ہندوستانی شہریوں پر راجیہ سبھا میں وزیر خارجہ ایس جے شنکر نے ایک بیان دیا۔ اس دوران انہوں نے کہا کہ تمام ممالک کی ذمہ داری ہے کہ اگر وہ اپنے شہری بیرون ملک غیر قانونی طور پر مقیم پائے جائیں تو انہیں واپس لے جائیں۔ ہم اس بات کو یقینی بنانے کے لیے امریکی حکومت کے ساتھ بات چیت کر رہے ہیں کہ وطن واپس آنے والوں کے ساتھ کوئی ناروا سلوک نہ ہو۔جے شنکر نے کہاکہ ایوان اس بات کی تعریف کرے گا کہ ہماری توجہ غیر قانونی امیگریشن انڈسٹری کے خلاف سخت کارروائی کرنے پر ہے۔ ایسا بھی ہونا چاہیے۔

جلاوطن افراد کی فراہم کردہ معلومات کی بنیاد پرقانون نافذ کرنے والے ادارے ایجنٹوں اور ایسی ایجنسیوں کے خلاف ضروری، احتیاطی اور مثالی کارروائی کریں گے۔وزیر خارجہ ایس جے شنکر نے جمعرات کو راجیہ سبھا میں کہا کہ تمام ممالک کی ذمہ داری ہے کہ وہ اپنے شہریوں کو واپس لے جائیں اگر وہ غیر قانونی طور پر بیرون ملک مقیم پائے جاتے ہیں۔ یہ پالیسی صرف ایک ملک پر لاگو نہیں ہوتی۔ ملک بدری کا عمل نیا نہیں ہے، یہ کئی سالوں سے جاری ہے۔جے شنکر نے ایوان کے سامنے اب تک امریکہ سے ہندوستان بھیجے گئے لوگوں کے اعداد و شمار بھی پیش کئے۔

انہوں نے کہا کہ سال 2009 میں 734، سال 2010 میں 799، سال 2011 میں 597 اور سال 2012 میں 530 ہندوستانیوں کو ڈی پورٹ کیا گیا۔ انہوں نے اس حوالے سے 2024 تک کا ڈیٹا شیئر کیا۔ درحقیقت جمعرات کو حزب اختلاف نے امریکہ میں بغیر دستاویزات کے رہنے والے ہندوستانیوں کی ملک بدری کے معاملے پر پارلیمنٹ کے دونوں ایوانوں میں ہنگامہ کیا۔اس سے قبل بدھ کو امرتسر ہوائی اڈے پر امریکی فوجی طیارہ اترا جس میں مبینہ طور پر بغیر دستاویزات کے امریکہ میں مقیم ہندوستانیوں کو لے جایا گیا۔

ڈونلڈ ٹرمپ کے دوسری بار اقتدار سنبھالنے کے بعد امریکہ میں مقیم ہندوستانیوں کی یہ پہلی ملک بدری ہے۔یہ کارروائی امریکی صدر ڈونالڈ ٹرمپ کے ساتھ جامع بات چیت کے لیے وزیر اعظم نریندر مودی کے واشنگٹن کے آنے والے دورے سے چند روز قبل سامنے آئی ہے۔ ڈی پورٹ کیے گئے لوگوں میں سے 30 کا تعلق پنجاب سے، 33 کا ہریانہ اور گجرات سے، تین کا مہاراشٹر اور اتر پردیش سے اور دو کا چنڈی گڑھ سے ہے۔ ڈی پورٹ کیے جانے والوں میں 19 خواتین اور 13 نابالغ شامل ہیں، جن میں ایک چار سالہ لڑکا اور پانچ اور سات سال کی دو لڑکیاں شامل ہیں۔