رام مندر کے چیف پجاری آچاریہ ستیندر داس فوت کرگئے

ایودھیا،12فروری (ایجنسیز) رام مندر کے چیف پجاری آچاریہ ستیندر داس کا انتقال ہو گیا ہے۔ انہوں نے 87 سال کی عمر میں ایس جی پی جی آئی، لکھنؤمیں آخری سانس لی۔آچاریہ ستیندر داس کو برین اسٹروک کے بعد 3 فروری کو لکھنؤ ایس جی پی جی آئی میں داخل کرایا گیا تھا۔ آچاریہ ستیندر داس کو تشویشناک حالت میں ایس جی پی جی آئی کے نیورولوجی وارڈ کے ایچ ڈی یو میں داخل کرایا گیا تھا۔آچاریہ کے انتقال پر ایودھیا کے مٹھوں، مندروں میں سوگ کی لہر دوڑ گئی۔

بتایا جا رہا ہے کہ ان کی آخری رسومات کل ایودھیا میں سریو ندی کے کنارے ادا کی جائیں گی۔ آچاریہ ستیندر داس نے تقریباً 32 سال تک رام مندر کی خدمت کی۔ رام للا کے چیف پجاری آچاریہ ستیندر داس بابری مسجد انہدام سے لے کر رام مندر کی تعمیر تک کے گواہ رہے تھے۔انہوں نے مندر میں رام للا کے پران پرتیشتھا کو بھی اپنی آنکھوں سے دیکھا ہے۔ آچاریہ ستیندر داس نے رام للا کی پوجا کی ذمہ داری لی جو 28 سال تک ایک خیمے میں رہتے تھے۔

اس کے بعد، انہوں نے تقریباً چار سال تک عارضی مندر میں بحیثیت چیف پجاری رام للا کی خدمت کی۔ وہ رام للا کے پران پرتشٹھا سے لے کر اب تک چیف پجاری کے طور پر خدمات انجام دے رہے تھے۔آپ کو بتا دیں کہ فروری 1992 میں متنازعہ زمین کی وجہ سے رام جنم بھومی کی ذمہ داری ضلع انتظامیہ کے پاس چلی گئی تھی۔ آچاریہ ستیندر داس کو 1 مارچ 1992 کو بی جے پی کے رکن پارلیمنٹ ونے کٹیار اور وشو ہندو پریشد کے رہنما اور اس وقت کے سربراہ اشوک سنگھل کی رضامندی سے مقرر کیا گیا تھا۔

جب ستیندر داس 1992 میں رام مندر میں تعینات ہوئے تو انہیں 100 روپے ماہانہ تنخواہ ملتی تھی۔ سال 2019 میں ایودھیا کے کمشنر کی ہدایات کے بعد ستیندر داس کی تنخواہ بڑھا کر 13 ہزار روپے کر دی گئی۔ رام للا کی پران پرتشٹھا کے بعد ان کی تنخواہ بڑھ کر 38500 روپے ہو گئی۔اس وقت، آچاریہ ستیندر داس سمیت کل 14 پجاری رام مندر میں خدمات انجام دے رہے تھے۔ ستیندر داس کے ساتھ ساتھ چار معاون پجاری بھی کافی عرصے سے رام مندر میں کام کر رہے ہیں،جب کہ حال ہی میں نو نئے پجاریوں کی تقرری کی گئی تھی۔