بی جے پی جمہوریت پر یقین نہیں رکھتی: طارق انور

نئی دہلی، 4 اپریل(سیجنسیز)

کانگریس لیڈر طارق انور نے پارلیمنٹ میں وقف ترمیمی بل کی مخالفت کے لیے انڈیا بلاک کی اجتماعی کوششوں کی تعریف کرتے ہوئے کہا کہ بھارتیہ جنتا پارٹی جمہوریت پر یقین نہیں رکھتی اور اس کا واحد مقصد ووٹوں کو پولرائز کرنا ہے۔ انہوں نے الزام لگایا کہ بی جے پی نے جمہوریت، آئین اور روایات کو نظر انداز کرتے ہوئے صرف اپنے سیاسی فائدے کے لیے کام کیا ہے۔ اپوزیشن کی مخالفت کے باوجود یہ بل پارلیمنٹ کے دونوں ایوانوں میں پاس ہو چکا ہے۔ طارق انور نے کہا کہ بی جے پی کا رویہ اکثریتی ہو گیا ہے جس میں یہ سمجھا جاتا ہے کہ اگر وہ اکثریت میں ہے تو وہ جو چاہے کر سکتی ہے۔

وہ کسی بھی چیز کو تباہ کر سکتی ہے، چاہے وہ آئین ہو، روایت ہو یا ثقافت۔ ان کا مقصد صرف یہ ہے کہ کسی بھی طریقے سے ووٹ کو پولرائز کیا جائے اور معاشرے میں نفرت کو بڑھایا جائے۔ طارق انور نے بل کے خلاف احتجاج میں متحد ہونے پر انڈیا بلاک کے اراکین کی تعریف کی اور کہا کہ یہ اچھی بات ہے کہ اس معاملے پر ملک بھر میں اتحاد دیکھا گیا۔ انہوں نے یہ بھی کہا کہ مستقبل میں اگر کوئی ایسا قومی مسئلہ پیدا ہوا جو عوامی مفاد میں ہو تو متحد ہو کر آواز اٹھائیں گے۔ انور نے یہ بھی کہا کہ بی جے پی نے اپنی اکثریتی طاقت کا غلط استعمال کیا ہے اور آئین اور قانون کو نظر انداز کیا ہے۔

انہوں نے کہا کہ اس بل سے پہلے بھی اگر وقف بورڈ کی طرف سے کوئی معاملہ حل نہیں ہوتا تھا تو وہ ٹربیونل میں جاتا تھا اور اس کے بعد بھی اگر معاملہ حل نہیں ہوتا ہے تو یہ ہائی کورٹ اور سپریم کورٹ میں جا سکتا ہے۔ کانگریس لیڈر نے کہا کہ بی جے پی کا یہ بل صرف فرقہ وارانہ ایجنڈے کا حصہ ہے، اور یہ مسلمانوں اور ملک کے مفاد میں نہیں ہے۔ انہوں نے کہا کہ اب اس مسئلہ کو عدالت میں چیلنج کیا جائے گا، اور کانگریس اور دیگر تنظیمیں اسے سپریم کورٹ میں لے جائیں گی۔