24 گھنٹوں میں مزید 60 اموات، مصر نے غزہ میں جنگ بندی کی نئی تجویز پیش کردی

غزہ،6اپریل( ایجنسیز)غزہ میں وزارت صحت نے ہفتے کے روز اعلان کیا ہےکہ گذشتہ 24 گھنٹوں کے دوران اسرائیلی فضائی حملوں میں مزید 60 افراد جان سے گئے۔ فلسطینی پناہ گزینوں کے لیے اقوام متحدہ کی ریلیف اینڈ ورکس ایجنسی (انروا) نے کہا ہے کہ غزہ میں جنگ بندی کے خاتمے سے 18 اور 23 مارچ کے درمیان 142,000 افراد بے گھر ہوئے اور جنگ شروع ہونے کے بعد سے 1.9 ملین افراد غزہ میں زبردستی بے گھر ہو چکے ہیں۔

فلسطینی پناہ گزینوں کے لیے اقوام متحدہ کی ریلیف اینڈ ورکس ایجنسی (انروا) کے کمشنر جنرل نے اسرائیلی حملوں کے دوبارہ شروع ہونے کے بعد سے غزہ کی پٹی میں روزانہ کم از کم 100 بچوں کی ہلاکت اور زخمی ہونے کی تصدیق کی ہے۔ دوسری جانب اقوام متحدہ کے بچوں کے فنڈ (یونیسیف) نے بچوں کے قتل عام کو ہولناک قرار دیا ہے۔

انروا کے چیف فلپ لازارینی نے ’ایکس‘ پلیٹ فارم پر ایک پوسٹ میں مزید کہا کہ جنگ کے آغاز سے لے کر اب تک غزہ میں مبینہ طور پر 15,000 بچے مارے جا چکے ہیں، ان کا کہنا تھا کہ جنگ نے غزہ کی پٹی کو بچوں کے لیے نہ جانے والے علاقے میں تبدیل کر دیا ہے۔

انہوں نے زور دے کر کہا کہ اس سال کے آغاز میں جنگ بندی نے غزہ کے بچوں کو زندہ رہنے کا موقع فراہم کیا اور صرف بچے بننے کا موقع دیا، لیکن جنگ کے دوبارہ شروع ہونے نے ان کا بچپن ایک بار پھر چھین لیا ہے۔

انہوں نے زور دے کر کہا کہ بچوں کا قتل خواہ وہ کہیں بھی ہوقطعی طور پر ناقابل جواز ہے۔غزہ میں جو کچھ ہو رہا ہے اسے انسانیت کے ضمیر پر داغ قرار دیا۔ انہوں نے پٹی میں فوری جنگ بندی کا مطالبہ کیا۔

نئی مصری تجویز
اسرائیلی نشریاتی ادارے نے ہفتے کے روز اطلاع دی ہے کہ مصر نے غزہ معاہدے کے لیے ایک نئی تجویز پیش کی ہے۔ انہوں نے مزید کہا کہ مصر کی نئی تجویز حماس اور اسرائیل کے درمیان ایک سمجھوتہ ہے۔

یہ اس وقت سامنے آیا ہے جب العربیہ اور الحدث کے نامہ نگاروں نے ہفتے کی صبح غزہ شہر کے الشجاعیہ محلے کے مشرق میں اسرائیلی ٹینکوں کی پیش قدمی کی اطلاع دی۔

اسرائیلی فوج نے شمالی غزہ کی پٹی کے علاقے الشجاعیہ میں زمینی آپریشن شروع کرنے کا اعلان کیا، جس کا مقصد سکیورٹی زون کو وسعت دینا اور اسیروں کی بازیابی کے لیے پٹی کے نئے علاقوں پر کنٹرول حاصل کرنے کے لیے فوجی دباؤ ڈالنا ہے۔

اسرائیلی فوج نے اعلان کیا کہ 401ویں بریگیڈ کی افواج نے شمالی غزہ کی پٹی میں محفوظ زون کو بڑھایا اور حماس کے بنیادی ڈھانچے کو تباہ کر دیا۔

غزہ کے متعدد علاقوں کو خالی کرنے کے اسرائیلی فوج کے احکامات نے بڑے پیمانے پر جبری نقل مکانی کی لہر کو جنم دیا ہے، کیونکہ لوگ بمباری سے بھاگ کر پٹی کے اندر محفوظ علاقوں کی تلاش میں ہیں۔