نیو دہلی،13مئی(ایجنسیز)آپریشن سندور کے بعد بھارت اور پاکستان کے درمیان کشیدگی کو کم کرنے کے لیے ہفتے کے روز جنگ بندی کا اعلان کیا گیا تھا۔ ہندوستان اور پاکستان کے ڈائریکٹر جنرل ملٹری آپریشنز (ڈی جی ایم او) نے 12 مئی کو مذاکرات کا پہلا دور منعقد کیا۔ پاکستانی دفاعی ذرائع کے مطابق، ڈی جی ایم او میجر جنرل کاشف عبداللہ اور ان کے ہندوستانی ہم منصب لیفٹیننٹ جنرل راجیو گھئی کے درمیان بات چیت کے لیے ہاٹ لائن کا استعمال کیا گیا۔
ڈی جی ایم اوز کے درمیان ہونے والی بات چیت میں اس عزم کو جاری رکھنے سے متعلق امور پر تبادلہ خیال کیا گیا کہ دونوں فریق ایک بھی گولی نہیں چلائیں گے۔ ایک دوسرے کے خلاف کوئی جارحانہ اور معاندانہ اقدام نہیں کریں گے۔ اس بات پر بھی اتفاق کیا گیا کہ دونوں فریق سرحدوں اور آگے کے علاقوں سے فوجیوں کی تعداد میں کمی کو یقینی بنانے کے لیے فوری اقدامات پر غور کریں گے۔ ہفتے کے روز زمینی، فضائی اور سمندری ہر قسم کی فائرنگ اور فوجی کارروائیوں کو فوری طور پر روکنے کے معاہدے کے اعلان کے بعد دونوں ممالک کے ڈی جی ایم اوز نے کل پیر کو پہلی بار بات کی۔
