بی جے پی فوج کو سیاست میں گھسیٹنا بند کرے۔ فوج آئین کی وفادار ہے کسی فرد کی نہیں۔ ایس ڈی پی آئی

نئی دہلی۔18مئی(پریس ریلیز)سوشیل ڈیموکریٹک پارٹی آف انڈیا (SDPI) نے بھارتیہ جنتا پارٹی (BJP) کی جانب سے بھارتی فوج کو سیاست میں گھسیٹنے کی شدید مذمت کی ہے۔اس ضمن میں پارٹی کے قومی نائب صدر محمد شفیع نے اپنے جاری کردہ اخباری بیان میں کہا ہے کہ مدھیہ پردیش کے نائب وزیر اعلیٰ جگدیش دیوڈا کا یہ بیان کہ ”فوج اور اس کے سپاہی وزیر اعظم نریندر مودی کے قدموں میں جھکتے ہیں“ نہ صرف بدقسمتی ہے بلکہ ہمارے بہادر سپاہیوں کی عزت اور قربانی کی بھی توہین ہے۔

یہ بیان ہمارے فوجیوں کے وقار کو کم سے کم کرکے انہیں محض سیاسی ہتھیار بناتا ہے۔ ہندوستان اور اس کی فوج آئین کی ذمہ دار ہے، کسی فرد کے ماتحت نہیں۔ نریندر مودی ملک کے وزیراعظم ہیں، بادشاہ نہیں کہ فوج یا ملک ان کے سامنے جھک جائے۔ بی جے پی کی طرف سے آپریشن سندور کی کامیابی کو انتخابی فائدے کے لیے استعمال کرنا، ‘ترنگا یاترا’ کو پروپیگنڈے کا ایک آلہ بنانا، اور وزیر وجے شاہ کی طرف سے کرنل صوفیہ قریشی جیسے ملک کے اتحاد کی علامت پر معروضی تبصرہ کرنا، اس پارٹی کی تقسیم کی اور مفاد پرست سیاست کو نمایاں کرتا ہے۔

ایس ڈی پی آئی بی جے پی سے مطالبہ کرتی ہے کہ وہ اس طرح کی غیر ذمہ دارانہ اور خطرناک سیاست کو فوری طور پر روکے۔ ہماری فوج کا احترام کیا جائے، انہیں کسی پارٹی کے ایجنڈے کا حصہ نہ بنایا جائے۔ علاوہ ازیں ہم تمام ہندوستانیوں سے اپیل کرتے ہیں کہ وہ فوجیوں کی بہادری کا احترام کریں اور کسی ایسے بیان یا خیال کی مخالفت کریں جو کسی لیڈر کو ملک کی خودمختاری سے بالاتر ظاہر کرنے کی کوشش کرتا ہو۔