نئی دہلی۔16جون(پریس ریلیز)۔ سوشیل ڈیموکریٹک پارٹی آف انڈیا (ایس ڈی پی آئی) کی قومی جنرل سکریٹری یاسمین فاروقی نے اپنے جاری کردہ اخباری بیان میں راجستھان حکومت کے پولیس دستاویزات میں اردو اور فارسی الفاظ کو ہندی الفاظ سے تبدیل کرنے کے حکم کی سخت مذمت کی ہے۔ حکومت کا دعویٰ ہے کہ یہ فیصلہ انتظامیہ کو آسان بنانے اور عدالتی عمل کو تیز کرنے کے لیے لیا گیا ہے، لیکن ایس ڈی پی آئی اسے ایک پوشیدہ سیاسی ایجنڈے کے طور پر دیکھتی ہے جس کا مقصد ہندوستان کے لسانی اور ثقافتی تنوع کو کمزور کرنا ہے۔
ایس ڈی پی آئی کا خیال ہے کہ زبان کو آسان بنانے کے نام پر لیا گیا یہ فیصلہ کسی ٹھوس تحقیق یا ڈیٹا پر مبنی نہیں ہے۔ اس بات کا کوئی ثبوت نہیں ہے کہ اردو یا فارسی الفاظ عدالتی عمل میں تاخیر کا سبب بنتے ہیں۔ اس کے برعکس انگریزی اور لاطینی میں پیچیدہ قانونی اصطلاحات کو نظر انداز کرنا اور صرف اردو اور فارسی کو نشانہ بنانا اس فیصلے کی اصل نیت کو بے نقاب کرتا ہے۔
راجستھان حکومت کے وزیر جواہر سنگھ بیدھم کا یہ دعویٰ کہ یہ الفاظ ”مغل دور” کے ہیں ایک خاص تاریخی تناظر کو بھی فروغ دیتے ہیں، جو اردو زبان کو اجنبی اور ہندوستان کی بنیادی شناخت سے مختلف کے طور پر پیش کرنے کی کوشش کرتا ہے – جبکہ اردو نہ صرف ہندوستان کی مٹی میں پیدا ہوئی ہے، بلکہ یہ آئینی طور پر تسلیم شدہ زبان بھی ہے۔
بی جے پی کی حکمرانی والی راجستھان حکومت کا یہ اقدام دیگر بی جے پی کی حکومت والی ریاستوں جیسے چھتیس گڑھ، مدھیہ پردیش اور اتر پردیش کی پالیسیوں کے عین مطابق ہے، جہاں ”خالص ہندی“ کو فروغ دینے کے نام پر لسانی تنوع کو روکا جا رہا ہے۔ اس سے قبل بھی راجستھان حکومت نے اردو میڈیم اسکولوں کو بند کرنے اور انتظامی عہدوں کے لیے اردو کی اہلیت کو ہٹانے جیسے فیصلے کیے ہیں، جس سے اردو بولنے والے طبقے بالخصوص مسلمانوں کو براہ راست نقصان پہنچا ہے۔ یہ ثقافتی ورثے کو مٹانے کی کوشش ہے۔
دہلی ہائی کورٹ نے 2019 میں ایک متوازن فیصلہ دیتے ہوئے آسان اردو الفاظ کے استعمال کو قبول کرتے ہوئے مشکل اردو الفاظ سے بچنے کی بات کہی تھی۔ لیکن یہ عملی راستہ اختیار کرنے کے بجائے راجستھان حکومت نے ماہرین لسانیات، قانونی ماہرین یا اردو بولنے والے طبقے سے مشورہ کیے بغیر یکطرفہ فیصلہ کیا ہے۔
ایس ڈی پی آئی راجستھان اردو ٹیچرس ایسوسی ایشن اور ان تمام تنظیموں کے ساتھ کھڑی ہے جنہوں نے اس حکم کو اردو کی ثقافتی حیثیت پر حملہ قرار دیا ہے۔ ہم اس حکم کو فوری طور پر منسوخ کرنے کا مطالبہ کرتے ہیں اور مطالبہ کرتے ہیں کہ قانونی اصطلاحات میں اصلاحات کا عمل شفاف ہو اور اس میں تمام لسانی برادریوں کو شامل کیا جائے۔ ہندوستان کی طاقت اس کے تنوع میں پنہاں ہے، اور ہم کسی بھی ایسی کوشش کو کامیاب نہیں ہونے دیں گے جو کسی کمیونٹی کی شناخت یا شراکت کو مٹانے کی کوشش کرے۔
