اسرائیل اور ایران کے درمیان محاذ آرائی نویں دن میں داخل

دبئی،22؍جون(ایجنسیز) پاسداران انقلاب میں فلسطین کور کے کمانڈر سعید ایزدی کو قتل کرنے کے اسرائیلی وزیر دفاع کے دعویٰ کے ساتھ اسرائیل اور ایران کے درمیان محاذ آرائی نویں دن میں داخل ہوگئی ہے۔ اسرائیلی وزیر دفاع یسرائیل کاٹز نے پاسداران انقلاب کی فلسطین کور کے کمانڈر محمد سعید ایزدی کے قتل کا اعلان کر دیا۔

کاٹز نے ہفتے کے روز ایک بیان میں کہا کہ اسرائیلی فورسز نے سعید ایزدی کو ختم کر دیا ہے جس نے حالیہ برسوں میں ایک ساتھ کئی مقامات سے زمینی حملے کے ذریعے اسرائیل کو تباہ کرنے کے منصوبے کی قیادت کی تھی۔

انہوں نے یہ بھی کہا کہ سعید ایزدی سپاہ پاسداران انقلاب کے اعلیٰ کمانڈر تھے جو غزہ میں حماس اور اسلامی جہاد تحریک کے ساتھ رابطے میں تھے۔ وہ ان گروپوں کو 7 اکتوبر کی تیاری کے لیے فنڈنگ اور مسلح کر رہے تھے۔ انہوں نے یہ بھی بتایا کہ یہ قتل قم شہر کے ایک اپارٹمنٹ میں ہوا۔

یہ بیان اس وقت سامنے آیا جب اسرائیلی فوج نے ہفتہ کو ہی اعلان کیا کہ اس نے گزشتہ روز پاسداران انقلاب کے دوسرے ڈرون یونٹ کے کمانڈر امین فوج جودخی کو قتل کردیا ہے۔ کمانڈر جنوب مغربی ایران کے علاقے اہواز سے اسرائیل کی طرف سینکڑوں ڈرون لانچوں کو مربوط کرنے کا ذمہ دار تھا۔

اسرائیلی فوج نے کہا کہ 13 جون کو ڈرون ہیڈ کوارٹر کے کمانڈر طہار فور کے قتل کے بعد جودخی نے پاسداران انقلاب کی سرگرمیوں میں مرکزی کردار سنبھالا تھا۔ 13 جون سے اب تک تقریباً 30 فوجی کمانڈروں کو قتل کیا جا چکا ہے۔ اسی طرح ایران کے 14 ایٹمی سائنسدانوں کو قتل کیا گیا ہے۔ اس کے جواب میں ایران نے اسرائیل کی جانب سینکڑوں ڈرون اور بیلسٹک میزائل داغ کر اسرائیل کو بھاری نقصان پہنچایا ہے۔