محکمہ موسمیات نے 16 ریاستوں کیلئے موسلادھار بارش کا الرٹ کیا جاری

نئی دہلی ،6جولائی ( آئی این ایس انڈیا )

قومی راجدھانی سمیت شمال مغربی ہندوستان کی کئی ریاستوں میں طوفانی بارشیں ہو رہی ہیں۔ اتراکھنڈ میں لینڈ سلائیڈنگ کی وجہ سے بدری ناتھ نیشنل ہائی وے کو بند کر دیا گیا ہے۔ ہماچل پردیش میں شدید بارش کے باعث ملبہ گرنے سے 64 سڑکیں ٹریفک کے لیے بند کردی گئی ہیں۔ ہریانہ، اتر پردیش، مشرقی راجستھان اور شمال مشرقی ریاستوں میں بھی موسلادھار بارش ہو رہی ہے۔ آسام میں شدید سیلاب کی وجہ سے صورتحال سنگین ہو گئی ہے اور ریاست کے 29 اضلاع میں 22 لاکھ سے زیادہ لوگ متاثر ہوئے ہیں۔محکمہ موسمیات نے شمال مغربی اور مشرقی ہندوستان میں اگلے دو دنوں میں طوفانی بارش کی پیش گوئی کی ہے اور 16 ریاستوں کو الرٹ جاری کیا ہے۔

ہندوستان کے محکمہ موسمیات نے جمعہ کو کہا کہ گزشتہ 24 گھنٹوں کے دوران مشرقی راجستھان، گجرات، آسام اور میگھالیہ میں مختلف مقامات پر موسلادھار بارش ہوئی۔ اس کے علاوہ اتراکھنڈ، ہماچل پردیش، مغربی مدھیہ پردیش، ہریانہ، بہار، مدھیہ مہاراشٹر، کونکن اور گوا میں کچھ مقامات پر بھاری بارش ریکارڈ کی گئی۔ اتراکھنڈ کے چمولی ضلع میں بھانیرپانی-پپل کوٹی ناگا پنچایت روڈ اور انگتھلا روڈ پر ملبہ گرنے سے بدری ناتھ قومی شاہراہ پر ٹریفک روک دی گئی۔ گنگوتری کے دیو گڑھ میں شدید بارش کی وجہ سے گومکھ فٹ پاتھ پل بہہ گیا۔ جس کی وجہ سے 30-40 یاتری پھنس گئے۔ ایس ڈی آر ایف نے یاتریوں کو دریا عبور کرنے میں مدد کی۔

دہرادون اور ہریدوار میں گڑھوں سے بارش کے پانی میں ڈوبنے سے دو لوگوں کی موت ہوگئی۔آئی ایم ڈی نے ہفتہ اور اتوار کو اتراکھنڈ میں شدید بارش کے حوالے سے ریڈ الرٹ جاری کیا۔ اس کے علاوہ پنجاب، دہلی، اتر پردیش، بہار، سکم، آسام، اروناچل پردیش، مدھیہ مہاراشٹر، گوا اور اندرونی کرناٹک میں ہفتہ کو شدید بارش کا اورنج الرٹ جاری کیا گیا ہے۔ ہماچل، مدھیہ پردیش، بنگال، اڈیشہ، کیرالہ، میزورم اور تریپورہ کے لیے یلو الرٹ ہے۔ اسی طرح اتوار کو مشرقی اتر پردیش، وسطی مہاراشٹر، اڈیشہ اور آسام کے لیے اورنج الرٹ اور پنجاب، اتر پردیش، بہار، جھارکھنڈ، تریپورہ، میزورم، کیرالہ اور تمل ناڈو کے لیے یلو الرٹ جاری کیا گیا ہے۔