ممتا حکومت کو بڑا جھٹکا، سندیش کھلی معاملے کی سی بی آئی جانچ جاری رہے گی

کولکاتہ ،۸؍جولائی ( آئی این ایس انڈیا )

ممتا بنرجی حکومت کو سپریم کورٹ سے جھٹکا لگا ہے۔ حکومت نے عدالت سے مطالبہ کیا تھا کہ کلکتہ ہائی کورٹ کے اس حکم کو مسترد کر دیا جائے جس میں سی بی آئی جانچ کی ہدایت دی گئی تھی۔ عدالت نے ممتا حکومت کی درخواست کو مسترد کر دیا ہے۔ اس دوران سپریم کورٹ نے پوچھا کہ ریاستی حکومت کسی کو بچانے کی کوشش کیوں کر رہی ہے؟کلکتہ ہائی کورٹ نے اپنے فیصلے میں سی بی آئی کو سندیشکھلی میں خواتین کے جنسی استحصال، زمینوں پر قبضے اور راشن گھوٹالہ سے متعلق معاملات کی جانچ کرنے کو کہا تھا۔اب سپریم کورٹ کے فیصلے کے بعد سی بی آئی سندیشکھلی کے طاقتور شاہجہاں شیخ اور ان کے ساتھیوں کے خلاف جنسی ہراسانی اور زمین پر قبضے کے الزامات کی تحقیقات جاری رکھے گی۔

جسٹس بی آر گاوائی اور کے وی وشواناتھن کی بنچ نے بھی ممتا بنرجی حکومت سے یہ جاننا چاہا کہ ریاست ایک شخص کو بچانے میں کیوں دلچسپی رکھتی ہے؟ شاہجہاں شیخ کو فروری میں سی بی آئی نے بنگال پولیس کے ساتھ تعاون کرنے کے بعد گرفتار کیا تھا۔ گرفتاری کے ایک دن بعد ٹی ایم سی نے شیخ کو بھی معطل کر دیا۔اپریل میں کلکتہ ہائی کورٹ نے شاہجہاں اور اس کے ساتھیوں کے خلاف 42 معاملات کی سی بی آئی انکوائری کا حکم دیا تھا۔ جس میں راشن گھوٹالے کے الزامات بھی شامل تھے۔ عدالت نے کہا تھا کہ یہ معاملہ پیچیدہ ہے اور اس کی غیر جانبدارانہ تحقیقات کی ضرورت ہے۔

مغربی بنگال حکومت نے اس حکم کو سپریم کورٹ میں چیلنج کیا تھا۔ اس سے پہلے بھی، سپریم کورٹ نے 29 اپریل کو تبصرہ کیا تھا کہ ریاست کو ایک فرد کے لیے درخواست گزار کے طور پر کیوں آگے آنا چاہیے، جس پر بنگال کے وکیل نے دلیل دی تھی کہ ہائی کورٹ کے فیصلے میں بنگال حکومت کے بارے میں تبصرے موجود ہیں۔بنگال حکومت کی نمائندگی کرنے والے سینئر وکیل ابھیشیک سنگھوی نے کہا کہ سی بی آئی کو ہائی کورٹ کی ہدایت ای ڈی سے متعلق دو ایف آئی آر تک محدود ہوسکتی تھی، لیکن اس میں دیگر مبینہ جرائم بھی شامل تھے۔