دارالہدیٰ اسلامک یونیورسٹی کے طلبہ نے قطر ڈیبیٹ چیمپئن شپ میں حاصل کیا عالمی اعزاز

کیرالہ،2نومبر(ایجنسیز) عربی زبان میں ہونے والی تیسری "ایشین عربی ڈیبیٹنگ چیمپئن شپ” (AADC3) کا شاندار اختتام ہوا، جس میں ممتاز علمی و فکری مباحثوں کے بعد دارالہدیٰ اسلامک یونیورسٹی (کیرالہ، ہند) کے طلبہ نے غیر عربی بولنے والوں کے زمرے میں بہترین ٹیم کا اعزاز حاصل کر کے پوری ملتِ اسلامیہ ہند کے لیے فخر و مسرت کا باعث بنے۔

یہ بین الاقوامی مقابلہ سلطنتِ عمان کے شہر سیب میں واقع عرب اوپن یونیورسٹی میں پانچ روز تک جاری رہا، جس کی میزبانی قطر ڈیبیٹ سینٹر اور سلطنتِ عمان کی وزارتِ ثقافت، کھیل و نوجوانان نے مشترکہ طور پر کی۔ تقریبِ اختتامیہ میں سلطنتِ عمان کی وزیرِ اعلیٰ تعلیم، تحقیق و اختراع محترمہ پروفیسر ڈاکٹر رحمہ بنت ابراہیم المحروقی، وزارتِ ثقافت، کھیل و نوجوانان کے انڈر سیکریٹری باسل بن احمد الرواسی، اور ریاستِ قطر کے وزارتِ کھیل و نوجوانان کے انڈر سیکریٹری و قطر ڈیبیٹ سینٹر کے نائب چیئرمین انجینئر یاسر بن عبداللہ الجمال شریک ہوئے۔

اس موقع پر انجینئر یاسر الجمال نے قطری طلبہ سے ملاقات کرتے ہوئے ان کی علمی و فکری سرگرمیوں کی تعریف کی اور بین الاقوامی سطح پر ان کی نمائندگی کو سراہا۔

قطر ڈیبیٹ سینٹر کی ایگزیکٹیو ڈائریکٹر ڈاکٹر حیاه المعرّفی نے اپنے خطاب میں کہا کہ یہ چیمپئن شپ نوجوانوں کو مکالمے، مباحثے اور فکری تبادلے کے ذریعے مضبوط بنانے کے مشن کا تسلسل ہے۔ انہوں نے کہا:

> "جو کام کبھی مناظرے پر ایمان کی ایک بیج کی طرح شروع ہوا تھا، آج ایک ایسے تناور درخت کی صورت اختیار کر چکا ہے جس کا سایہ دوحہ سے لے کر عمان تک پھیلا ہوا ہے۔”

قطر ڈیبیٹ کے سفیر اور عمان ڈیبیٹس کے بانی سالم الشماخی نے کہا کہ عمان کی میزبانی فکری و علمی مکالمے کے شعبے میں ایشیا کے لیے ایک سنگِ میل ہے، اور اس کامیابی نے عمان کو فکری و تہذیبی تبادلے کے مرکز کے طور پر نمایاں کیا ہے۔

نتائج کے مطابق، عربی بولنے والوں کے زمرے میں سلطان قابوس یونیورسٹی نے پہلی پوزیشن حاصل کی، کارنیگی میلن یونیورسٹی قطر دوسری پر رہی، جب کہ قطر یونیورسٹی نے تیسری پوزیشن حاصل کی۔
جبکہ غیر عربی بولنے والوں کے زمرے میں دارالہدیٰ اسلامک یونیورسٹی (کیرالہ، بھارت) نے پہلا مقام حاصل کیا، اور انسٹی ٹیوٹ مسلم چنڈیکیہ (انڈونیشیا) نے دوسری پوزیشن حاصل کی۔

دارالہدیٰ اسلامک یونیورسٹی کی یہ کامیابی نہ صرف بھارت کے لیے بلکہ پورے عالمِ عربی و اسلامی دنیا کے لیے فخر کا باعث ہے، جس نے اہلِ سنت والجماعت کے اس معروف علمی ادارے کی علمی برتری، زبان دانی، اور فکری صلاحیتوں کو عالمی سطح پر منوایا ہے۔