گجرات میں چاندی پورہ وائرس سے19 بچے لقمہ اجل بن گئے

احمد آباد، 18جولائی (آئی این ایس انڈیا )

پی ایم مودی کی آبائی ریاست گجرات میں چندی پورہ وائرس کا پھیلاؤ بڑھتا جا رہا ہے۔ محکمہ صحت کے حکام نے بتایا کہ بدھ کو اس وائرس کی وجہ سے مزید دو اموات کی اطلاع ملی ہے۔ اس سے دو ہفتوں میں مشتبہ اموات کی کل تعداد 19 ہو گئی ہے۔ریاستی وزیر صحت رشیکیش پٹیل نے بتایا کہ چندی پورہ وائرس کی وجہ سے اراولی کے موٹا کنتھریا کے ایک بچے کی موت کی تصدیق نیشنل انسٹی ٹیوٹ آف وائرولوجی (این آئی وی)، پونے سے رپورٹ موصول ہونے کے بعد ہوئی ہے۔ سابر کانٹھا کے ایک سرکاری اسپتال میں حال ہی میں ایک چار سالہ بچے کی وائرس سے موت ہوگئی۔

حکام نے بتایا کہ بدھ کے روز وائرس کی وجہ سے دو مزید اموات کی اطلاع کے بعد تصدیق ہوئی۔چاندی پورہ وائرس فلو جیسی علامات کے ساتھ بخار اور شدید انسیفلائٹس کا سبب بنتا ہے۔ یہ ریت میں پائے جانے والے مچھروں اور مکھیوں کے ذریعے پھیلتا ہے۔ یہ وائرس شمالی گجرات کے نئے علاقوں میں پھیل رہا ہے۔ گاندھی نگر ضلع کے دیہگام تعلقہ کے امراجی نمواڈا گاؤں کے سات سالہ لڑکے کو چندی پورہ وائرس انسیفلائٹس کی علامات کی وجہ سے منگل کو احمد آباد کے سول اسپتال میں داخل کرایا گیا تھا۔

اس کے نمونے جانچ کے لیے نیشنل انسٹی ٹیوٹ آف وائرولوجی، پونے بھیجے گئے ہیں۔حکام نے بتایا کہ ضلع پنچمحل میں ایک اور مشتبہ کیس کی اطلاع ملی، جہاں گودھرا تعلقہ کے بڑیا فالیو کی ایک چار سالہ لڑکی کو بخار، الٹی اور درد جیسی علامات کے بعد وڈودرا کے ایس ایس جی اسپتال میں داخل کرایا گیا تھا۔

ایک اہلکار کے مطابق، ریاست میں اب تک کل 26 مشتبہ کیسز رپورٹ ہوئے ہیں، جن میں حالیہ ہفتوں میں 14 مشتبہ اموات بھی شامل ہیں۔ تاہم ان میں سے زیادہ تر کیسز ابھی زیر تفتیش ہیں اور تصدیق کے منتظر ہیں۔ریاستی وزیر صحت نے کہا کہ یہ کیس سابر کانٹھا، اراولی، مہی ساگر، کھیڑا، مہسانہ اور راجکوٹ اضلاع سے رپورٹ ہوئے ہیں۔ محکمہ صحت کے حکام نے نگرانی کی کوششیں بڑھا دی ہیں۔ گاندھی نگر کے متاثرہ گاؤں میں 60 گھروں کا سروے کیا گیا، لیکن کوئی نیا مشتبہ کیس نہیں ملا۔

ریاستی محکمہ صحت ان معاملات کی تحقیقات، کسی بھی ممکنہ پھیلاؤ کو روکنے اور متاثرہ افراد کے علاج کے لیے کام کر رہا ہے۔ریت کی مکھیوں کو دور رکھنے کے لیے بچوں کی کھلی جلد پر کیڑے مار دوا کا پیسٹ استعمال کریں۔ لمبی بازو کی قمیصیں اور لمبی پینٹ پہنیں۔ سوتے وقت مچھر دانی کا استعمال کریں۔ اگر بخار، قے اور درد جیسی علامات ظاہر ہوں تو فوراً ہسپتال لے جائیں۔