روزگار کو گائوںتک لے جانے کی ضرورت ہے

 

ازقلم:کرشنا کماری مینا،

اجمیر، راجستھان

’’میں نے 12ویں تک سائنس کی تعلیم حاصل کی ہے۔ پھر گھر کی مالی حالت خراب ہونے کی وجہ سے میں نے ملازمت کی تلاش شروع کی۔ لیکن مجھے کہیں بھی نوکری نہیں ملی۔ جس کے بعد مجھے ماربل فیکٹری میں مزدور کے طور پر کام کرنا پڑتا ہے۔ میں جب بھی روزگار کی تلاش میں جاتا تھا،مایوسی ہاتھ آتی تھی۔ اس لیے اب میں نے روزگار کی تلاش ترک کر مزدوری کر رہا ہوں۔ کم از کم میں اس سے آمدنی حاصل کر تورہا ہوں۔‘‘ یہ بات 26 سالہ راجکنور دوسا کا کہنا ہے، جو کہ گریجویٹ ہیںاور راجستھان کے دھووالیہ ناڈا گاؤں کے رہنے والے ہیں۔ یہ گاؤں اجمیر سے تقریباً 15 کلومیٹر کے فاصلے پر واقع ہے۔ قریب 650 افراد کی آبادی والے اس گاؤں میں تقریباً 100 گھر ہیں۔ جس میں بھیل، ریگر اور مسلم خاندانوں کی تعداد زیادہ ہے۔ اس گاؤں کا سب سے بڑا مسئلہ روزگار ہے۔ چند ہی خاندان ایسے ہیں جو مستقل طور پر روزگار سے وابستہ ہیں۔گاؤں کے 45 سالہ تولارام کا کہنا ہے کہ اس کے خاندان میں 6 افراد ہیں۔ جن کی دیکھ بھال کی ذمہ داری ان کے کندھوں پر ہے۔ جس کے لیے وہ مقامی ماربل فیکٹری میں بطور سپروائزر کام کرتے ہیں۔ ان کا کہنا ہے کہ انہوں نے گریجویشن تک تعلیم حاصل کی ہے اور اسی بنیاد پر انہوںنے کئی بار سرکاری ملازمت کے لیے درخواست بھی دی۔ لیکن جب انہیں نوکری نہیں ملی تو ماربل فیکٹری میں کام شروع کر دیا۔ تولارام کا کہنا ہے کہ وہ مالی طور پر بہت کمزور ہے۔ ان کے پاس اتنا پیسہ نہیں تھا کہ وہ کوئی سیلف ایمپلائمنٹ کر سکے۔ اس لیے اس نے پرائیویٹ نوکری کرنا ہی بہتر سمجھا۔

 

ان کا کہنا ہے کہ گاؤں کے بہت سے نوجوان ایسے ہیں جو اچھی تعلیم حاصل کرنے کے باوجوددر در کی ٹھوکریں کھا رہے ہیں اور انہیں کوئی روزگار نہیں مل رہا ہے۔ ان کا کہنا ہے کہ گاؤں میں روزگار کے ساتھ ساتھ کئی طرح کی بنیادی سہولیات کا بھی فقدان ہے۔ جس کا گاؤں کی ترقی پر بھی منفی اثر پڑتا ہے۔ گاؤں میں آج تک کنکریٹ کی سڑک نہیں بن سکی۔ جس کی وجہ سے یہاں آمدورفت کا بڑا مسئلہ ہے۔ گاؤں سے شہر جانے کے لیے کوئی آٹو یا کوئی دوسرا ذریعہ دستیاب نہیں ہے۔ ایسے میں ملازمت کرنے والوں کو بھی مشکلات کا سامنا کرنا پڑتا ہے۔ جو لوگ روزگار یا مزدوری کے لیے روزانہ اجمیر شہر جاتے ہیں، انھیں گاؤں سے ڈیڑھ کلومیٹر پیدل چل کر مین روڈ تک جانا پڑتا ہے، جہاں سے شہر جانے کے لیے گاڑیاں دستیاب ہوتی ہیں۔ ان کا کہنا ہے کہ اگر گاؤں میں پکی سڑک بنائی جاتی تو آمدورفت میں آسانی ہوتی جس سے روزگار کے لیے کام کرنے والوں کو آسانی ہوتی۔

 

گریجویشن کے آخری سال کی طالبہ 21 سالہ کسم کا کہنا ہے کہ دھووالیہ ناڈا کے زیادہ تر نوجوان یا تو پرائیویٹ نوکری کرتے ہیں یا باہر جا کر مزدوری کرتے ہیں کیونکہ گاؤں میں ہر ایک کے پاس زراعت کے لائق زمین نہیں ہے اور نہ ہی خود روزگار کا کوئی آپشن ہے۔وہ کہتی ہیں کہ ان کی گریجویشن جلد مکمل ہونے والی ہے۔ اسی بنیاد پر وہ پچھلے کچھ مہینوں سے ملازمت کے لیے مسلسل کوششیں کر رہی تھی۔ لیکن انہیں ابھی تک کامیابی نہیں ملی ہے۔ کسم کہتی ہیں کہ گاؤں میں لڑکوں کے ساتھ ساتھ لڑکیوں کی تعلیم پر بھی زور دیا جاتا ہے۔ اس لیے یہاں تمام بچے اسکول جاتے ہیں۔ لیکن تعلیم حاصل کرنے کے بعد وہ روزگار کی تلاش میں بھٹکتے نظر آتے ہیں۔ پھر وہ یا تو فیکٹریوں میں کام کرنے لگتے ہیں یا کسی پرائیویٹ ادارے میں بہت کم تنخواہ پر کام کرتے ہیں۔ وہ کہتی ہیں کہ گاؤں میں خود روزگار کے کوئی آپشن نہیں ہیں۔ یہی وجہ ہے کہ نوجوان اپنا کاروبار شروع کرنے کے بجائے کہیں اور کام کرتے ہیں۔ اگر حکومت اور متعلقہ محکموں کی طرف سے دیہاتوں میں خود روزگار کے اختیارات دستیاب کرائے جاتے ہیں، تو یہ بہت سے نوجوانوں، خاص طور پر نوعمر لڑکیوں کو بااختیار بنانے کی طرف ایک بہت ہی بامعنی اقدام ہوگا۔ اس وقت گاؤں کی لڑکیاں خود روزگار کے نام پر کپڑے سلائی کرتی ہیں۔ لیکن انہیں اس سے زیادہ فائدہ نہیں ملتا۔ اگر انہیںروزگار سے متعلق ہنر کی تربیت دی جائے تو وہ گاؤں میں رہ کر مالی طور پر مضبوط ہو سکتے ہیں۔

 

ایک اور نوجوان 32 سالہ جیرام ریگر کا کہنا ہے کہ اس نے کہیں اور کام کرنے پر زرعی کام کو ترجیح دی اور زمین کے ایک چھوٹے سے ٹکڑے پر کھیتی باڑی شروع کی، جو اس کی خاندانی زمین ہے۔ لیکن کبھی آبپاشی کا مسئلہ تھا اور کبھی بیج یا مارکیٹنگ کا۔ جس کی وجہ سے اسے کافی نقصان اٹھانا پڑا۔ یہی وجہ ہے کہ اب اس نے اسے چھوڑ کر نوکری کرنے کا فیصلہ کیا ہے۔ تاہم اب انہیں روزگار کے حصول میں کافی مشکلات کا سامنا ہے۔ وہ کہتے ہیں کہ ’’اگر گاؤں میں رہتے ہوئے انہیں خود روزگار کا کوئی ذریعہ میسر آجائے تو یہ ان کے لیے بہت اچھا ہوگا۔ لیکن وہ نہیں جانتے کہ اس کے لیے کیا کرنا ہے؟انہوں نے بتایا کہ خود روزگار سے متعلق کئی اسکیمیںحکومت کی جانب سے چلائی جا رہی ہیں۔ لیکن اس کا کیسے فائدہ اٹھانا ہے انہیں اس کا علم نہیں ہے۔ ایک اور نوجوان بارہویں پاس مکیش کا کہنا ہے کہ جب اس کے پاس روزگار کا کوئی دوسرا ذریعہ نہیں تھا تو اسے مزدوری کرنی پڑی۔جس میں اسے بہت کم آمدنی ہوتی ہے۔ کام کے سلسلے میں اسے روز اجمیر شہر جانا ہوتا ہے۔جس میں اس کے کافی پیسے خرچ ہو جاتے ہیں۔ وہ کہتے ہیں کہ مویشی پالن ایک اچھا روزگار ہے۔ اسے شروع کرنے کے لئے اس نے بینک سے لون لینا چاہے لیکن اسے کامیابی نہیں ملی۔

 

تاہم، نوجوانوں کو روزگار فراہم کرنے کے لیے مرکزی اور ریاستی حکومتوں کی طرف سے بہت سی اسکیمیں چلائی جا رہی ہیں۔ راجستھان حکومت نے چیف منسٹرا سمال انڈسٹریز پروموشن اسکیم شروع کی ہے۔ اس کے تحت ریاست کے بے روزگار نوجوانوں کو روزگار شروع کرنے کے لیے بینک سے قرض دیا جاتا ہے جس میں سبسڈی بھی فراہم کی جاتی ہے۔ اس اسکیم کے تحت حکومت کی طرف سے کاروبار کے لحاظ سے 25 لاکھ روپے سے لے کر 10 کروڑ روپے تک کے قرضے دیئے جاتے ہیں۔ اسکیم کے تحت فراہم کردہ قرضہ بینکوں کے ذریعے دیا جاتا ہے۔ اس میں حکومت کی طرف سے سبسڈی بھی دی جاتی ہے تاکہ نوجوانوں کو قرض کی ادائیگی میں کسی قسم کا ذہنی دباؤ نہ ہو۔ اس کے علاوہ اس سال کے مرکزی بجٹ میں بھی دیہی علاقوں کی ترقی پر خصوصی توجہ دینے کے ساتھ روزگار پیدا کرنے کی بات کی گئی ہے۔ اس کے لیے اسکل ڈیولپمنٹ سے لے کر ایجوکیشن لون، اپرنٹس شپ کے لیے ترغیب، ای پی ایف میں شراکت کے ساتھ پہلی نوکری حاصل کرنے والوں کی تنخواہ میں شراکت اور نئے پنشن سسٹم کے لیے شراکت میں اضافہ جیسے اہم اقدامات کیے گئے ہیں۔

 

درحقیقت ہمارے ملک میں روزگار ایک بڑا چیلنج بنتا جا رہا ہے۔ ملک کے بیشتر دیہی علاقوں میں مقامی سطح پر روزگار کی شدید کمی ہے۔ یہی وجہ ہے کہ ان علاقوں سے بڑی تعداد میں لوگ روزگار کے لیے بڑے شہروں اور صنعتی علاقوں کی طرف ہجرت کرتے ہیں۔ تاہم، منریگا دیہی علاقوں میں روزگار کا ایک اہم ذریعہ ہے۔ لیکن خود روزگار اس سمت میں ایک اہم کڑی ثابت ہو سکتا ہے۔ سیلف ہیلپ گروپ گائوں میں روزگار فراہم کرنے کا سب سے طاقتور ذریعہ بھی ہیں۔اس کے لئے نوجوانوں کو اس سے جوڑنے، انہیں آسان قرضے فراہم کرنے اور اس سمت میں رہنمائی کرنے کی ضرورت ہے۔ اگر روزگار کو دیہات تک لے جایا جائے تو نہ صرف دیہی علاقے معاشی طور پر مضبوط ہوں گے بلکہ شہروں پر بوجھ بھی کم ہوگا۔ (چرخہ فیچرس)