موب لنچنگ میں جاں بحق اورنگزیب کی بہن کو دو لاکھ کی مالی امداد

علی گڑھ،3اگست ( آئی این ایس انڈیا )

اورنگزیب کی بہن ذکیہ نے صحافیوں کو بتایا آج مجھے سماجوادی پارٹی کی جانب سے ایک لاکھ روپے کا چیک اور سابق رکن اسمبلی ظفر عالم نے ایک لاکھ روپے نقد دیا ہے۔ ذکیہ نے نام لیے بغیر بتایا کہ ہم پر سمجھوتہ کرنے کے لئے مستقل ہم پر دباؤ بنایا جا رہا ہے، ہمیں پریشان کیا جا رہا یے لیکن ہمیں سمجھوتہ نہیں کرنا ہے، ہمیں انصاف چاہیے۔ پولیس نے ابھی تک میرے بھائی کے قتل معاملہ میں فرار نامزد ملزمین کو بھی گرفتار نہیں کیا ہے اور نہ ہی حکومت نے ہمیں کوئی معاوضہ دیا ہے۔

واضح رہے کہ عید الاضحی کے دوسرے روز یعنی 18 مئی کی دیر رات ہجوم نے اورنگزیب کو بے رحمی سے پیٹ پیٹ کر ہلاک کر دیا تھا جس کا ویڈیو سوشل میڈیا پر بھی وائرل ہوا تھا۔ اس کے بعد پولیس نے گیارہ نامزد ملزمین کے خلاف مقدمہ درج کیا مگر صرف چھ ملزمان کو ہی گرفتار کیا، دیگر پانچ نامزد ملزمین ابھی بھی فرار ہیں جن کو گرفتار کرنے میں پولیس ناکام ثابت ہورہی ہے۔اس موقعے پر موجود سماجوادی کے لیڈران نے صحافیوں کو بتایا کہ ہمیں اورنگزیب کی موت کا بہت افسوس ہے۔ آج ہم نے اورنگزیب کی خاندان کی دو لاکھ روپے کی مالی مدد کی ہے۔

اورنگزیب کے خاندان والوں کو ابھی بھی انصاف نہیں ملا ہے؛ لیکن روزے اول سے ہی سماجوادی پارٹی اورنگزیب کو انصاف کے لئے خاندان کے ساتھ کھڑی ہے۔انہوں نے مقتول اورنگزیب اور اس کے خاندان والوں پر درج مقدمات کو پولیس کی جانب سے یکطرفہ دباؤ بنانے کی کوشش قرار دیا۔ انہوں نے کہا کہ اورنگزیب پر چوری کا الزام عائد کرکے اورنگزیب کی موت کے تقریبا 18 دنوں کے بعد مقدمہ درج کیا گیا ہے جو بے بنیاد ہے۔ ان کے پاس چوری کرنے کا کوئی ثبوت نہیں ہے اور نہ ہی موب لنچنگ کے روز یا اس کے اگلے دن اورنگزیب کے خلاف کوئی تحریر تھانے میں دی گئی تھی۔