Skip to content
اسرائیل کےلئے امریکی فنڈنگ : غزہ کے حق میں مظاہرے میں ایک لاکھ افرادکی شرکت متوقع
نیویارک،18اگست ( آئی این ایس انڈیا)
رواں ہفتے شکاگو میں حکمراں ڈیموکریٹ پارٹی کی نیشنل کانفرنس کا انعقاد ہو رہا ہے۔ اس موقع پر توقع ہے کہ فلسطینیوں کے حامی تقریبا ایک لاکھ مظاہرین اکٹھا ہو کر غزہ میں اسرائیلی جنگ کے لیے امریکی فنڈنگ اور اسرائیل کے لیے صدر جو بائیڈن کی پالیسی کیخلاف احتجاج کریں گے۔کانگریس میں سیکورٹی ذمے داران نے ایوان نمائندگان کے ڈیموکریٹ ارکان کو ہدایت کی ہے کہ وہ کانفرنس کے موقع پر ہوٹل کے کمروں کو اپنے ناموں پر مختص نہ کرائیں۔
مزید یہ بھی خبردار کیا گیا ہے کہ وہ شکاگو شہر کے مخصوص علاقوں میں قیام سے گریز کریں۔انگریزی نیوز ویب سائٹ axios کے مطابق ذاتی ناموں پر ہوٹل کے کمرے مختص نہ کرانے کی وجہ یہ ہے کہ حالیہ دنوں میں ہوٹلوں کو مشکوک کالیں موصول ہوئیں جن میں بعض افراد کے بارے میں معلومات حاصل کرنے کی کوشش کی گئی۔
ایک ڈیموکریٹ رکن کانگریس کے مطابق زیادہ تر ارکان اپنی ذاتی سیکورٹی کے حوالے سے نہایت تشویش کا شکار ہیں۔کانگریس میں ڈیموکریٹ ارکان کو ان کی سیکورٹی کے حوالے سے خبردار کرنے کے لیے ان کے دفاتر کو تنبیہ بھیجی گئی ہے۔ اس میں کہا گیا ہے کہ اگر آپ کا سامنا مظاہرین سے ہو جائے تو ان سے الجھنے کی کوشش نہ کریں اور کیپیٹول پولیس کو اطلاع کریں۔دوسری جانب امریکا نے دوحہ میں دو روز جاری رہنے والی بات چیت کے اختتام پر اسرائیل اور حماس کو ایک نئی تجویز پیش کی۔
اس کا مقصد فریقین کے بیچ باقی ماندہ خلیج کو پاٹنا اور کسی معاہدے تک پہنچنے کی کوشش کرنا ہے۔ایک امریکی ذمے دار کے مطابق نئی تجویز تقریبا تمام باقی ماندہ خلیج پاٹ دے گی جو گذشتہ چھ ہفتوں سے زیر بحث تھی۔غزہ کے سمجھوتہ سے متعلق بات چیت سے با خبر اسرائیلی ذمے داران نے یسرائیل ہیوم اخبار کو بتایا کہ وساطت کار ثالثیوں کے ساتھ سمجھوتے کے مختلف پہلوؤں میں بڑی پیشرفت ہوئی ہے۔
ذمے داران نے واضح کیا کہ اس پیش رفت کا تعلق سرحدی راہ داری ‘فلاڈلفی’ کے مسئلے اور غزہ پٹی کے شمال میں شہریوں کی نقل و حرکت سے ہے۔ انھوں نے باور کرایا کہ اسرائیلی فورسز مذکورہ راہ داری میں باقی رہیں گی۔
Like this:
Like Loading...
