کیا اسمرتی ایرانی بھاجپاکیلئے دہلی کی سی ایم کا چہرے بنیں گی ؟

نئی دہلی ، 29اگست ( آئی این ایس انڈیا )

سابق مرکزی وزیر اور بی جے پی لیڈر اسمرتی ایرانی اپنے بیانات کی وجہ سے ہمیشہ خبروں میں رہتی ہیں۔ حالانکہ لوک سبھا انتخابات میں ذلت آمیز شکست کے بعد انہوں نے بہت کم بیانات دیئے ہیں۔ دریں اثنا،جمعرات کو ایک پروگرام میں جب ان سے پوچھا گیا کہ کیا وہ دہلی میں وزیراعلیٰ کا چہرہ بنیں گی؟اس پر انہوں نے کہا کہ پچھلے دس سالوں میں گلی کوچوں کے انتخابات سے لے کر میئر کے انتخابات ہوں، اسمبلی انتخابات ہوں یا کوئی اور الیکشن، میرا نام لیا گیا ہے۔ ایسے سوالات اب مجھے پریشان نہیں کرتے اور نہ ہی مجھے عجیب لگتے ہیں۔

بشرطیکہ میں ایسے سوالات کو مزاح کے طور پر لیتی ہوں۔ان کا مزید کہنا تھا کہ اگر آپ کو اپنے ملک، ریاست اور معاشرے کی خدمت کرنے کا موقع ملتا ہے تو یہ اعزاز کی بات ہے، کیوں نہیں؟ ملک کی 140 کروڑ کی آبادی میں سے کتنے لوگ ایسے ہیں جنہیں پارلیمانی انتخابات میں خدمت کا موقع ملتا ہے۔ انہوں نے کہا کہ میں تین بار پارلیمنٹ پہنچی ہوں۔ مرکزی حکومت میں پانچ چھ محکموں کے وزیر کے عہدے پر فائز ہونے کا موقع ملا۔ اس کے علاوہ انہوں نے راشٹریہ مہیلا مورچہ کی صدر سمیت بی جے پی تنظیم میں کئی عہدوں کی ذمہ داری نبھائی ہے۔

اب اگر مجھے کوئی ذمہ داری ملتی ہے تو میں اسے خدمت کے نقطہ نظر سے دیکھتی ہوں۔تاہم جیسے ہی کانگریس کے رکن پارلیمنٹ راہل گاندھی اور دہلی کے وزیر اعلی اروند کجریوال کا نام آیا، انہوں نے کہا کہ دونوں کا نقطہ نظر مختلف ہے۔ کجریوال جیل میں ہیں، جبکہ راہل گاندھی کا ایکو سسٹم اتنا تیز ہے کہ انہیں یادہی نہیں رہتا ان کی اپنی تاریخ کیا ہے؟ جہاں تک راہل گاندھی کی سیاست کا تعلق ہے،تو ان کے سیاست کے طریقہ کار میں تبدیلی آئی ہے۔ اب وہ سمجھتے ہیں کہ وہ ہندوستانی سیاست میں کامیاب ہو گئے ہیں۔