سپریم کورٹ کے جج سوشل میڈیا پر ٹرولنگ سے پریشان

نئی دہلی ،3ستمبر ( آئی این ایس انڈیا )

دہلی کے وزیر اعلی اروند کجریوال کے پی اے بیبھو کمار کو سپریم کورٹ سے ضمانت مل گئی ہے۔ بیبھو کمار پر عام آدمی پارٹی کی راجیہ سبھا ایم پی سواتی مالیوال پر حملہ کرنے کا الزام تھا۔

اس سے پہلے دہلی ہائی کورٹ نے بیبھو کمار کو ضمانت دینے سے انکار کر دیا تھا۔ اس کے بعد بیبھو کمار نے سپریم کورٹ سے رجوع کیا تھا۔ تاہم سماعت کے دوران سوشل میڈیا ٹرولنگ کا بھی چرچا ہونے لگا اور سپریم کورٹ نے اس پر تبصرہ کیا۔پیر کو جسٹس سوریہ کانت اور جسٹس اجل بھوئیاں کی بنچ بیبھو کمار کی ضمانت کیس کی سماعت کر رہی تھی۔ سماعت کے دوران سواتی مالیوال کے وکیل نے کہا کہ جرم ختم نہیں ہوا اور یہ اب بھی سوشل میڈیا پر جاری ہے۔ انہوں نے کہا کہ درخواست گزار (بیبھو کمار) اور ان کے حامی مجھے سوشل میڈیا اور ہر جگہ ٹرول کر رہے ہیں۔

اس کے بعد بیبھو کمار کے وکیل ابھیشیک منو سنگھوی نے کہا کہ کیا میں سوشل میڈیا کو کنٹرول کرتا ہوں؟ انہوں نے کہا کہ آپ کے لارڈ شپ جانتے ہیں کہ ہمیں اور ججز کو بھی کیسے ٹرول کیا جاتا ہے۔ ابھیشیک منو سنگھوی کے تبصرے پر جسٹس بھویان نے کہا کہ ٹرولنگ بدقسمتی ہے۔ جب ہم ایک فریق کے حق میں فیصلہ دیتے ہیں تو دوسری طرف سے ہمیں ٹرول بھی کیا جاتا ہے۔

غیر ذمہ دار لوگوں کا ایک بڑا طبقہ ہے جو اپنے حقوق سے واقف نہیں۔ وہ حملہ کرتے ہیں، لیکن انہیں نظر انداز کیا جانا چاہیے۔ وہ ٹرول کے بعد اپنی ساکھ کھو دیتے ہیں۔بیبھو کمار کو ضمانت دیتے ہوئے سپریم کورٹ نے کہا کہ اس کیس میں چارج شیٹ پہلے ہی داخل کی جا چکی ہے۔ اس لیے اس کی رہائی پر کوئی اثر نہیں پڑے گا۔ عدالت نے کہا کہ 51 سے زائد گواہوں پر جرح ہونے جا رہی ہے اور کیس کی سماعت مکمل ہونے میں کافی وقت لگے گا۔ بیبھو کمار کو سپریم کورٹ سے شرائط کے ساتھ ضمانت مل گئی ہے۔