یوگیندر یادو نے آتشی کو دہلی کی تیسری خاتون وزیر اعلیٰ بننے پر مبارکباد پیش کی

نئی دہلی،۱۷؍ستمبر ( آئی این ایس انڈیا )

عام آدمی پارٹی (اے اے پی) قانون ساز پارٹی نے منگل 17 ستمبر کو آتشی کو اپنا لیڈر منتخب کیا۔ اب وہ دہلی کی وزیر اعلیٰ کے طور پر حلف لیں گی۔ سابق ساتھی اور سوراج انڈیا کے بانی یوگیندر یادو نے آتشی کو سوشل میڈیا پلیٹ فارم X پر دہلی کی تیسری خاتون وزیر اعلیٰ بننے پر مبارکباد دی۔عام آدمی پارٹی (اے اے پی) کے سابق رہنما یوگیندر یادو نے کہاکہ،مبارک ہو آتشی! آپ جیسی خاتون کارکن جو عوامی تحریکوں اور تخلیقی تجربات کے ساتھ سیاست میں آئی، وزیر اعلیٰ بننا ملک اور دہلی کے لیے ایک اچھی علامت ہے۔

دل کی گہرائیوں سے مبارکباد!یوگیندر یادو عام آدمی پارٹی (اے اے پی) کے بانی ارکان میں سے ایک ہیں۔ سال 2015 میں انہیں کافی تنازعات کے بعد پارٹی سے الگ ہونا پڑا اور سینئر وکیل پرشانت بھوشن کے ساتھ مل کر انہوں نے سوراج ابھیان تنظیم شروع کی۔آتشی عام آدمی پارٹی (اے اے پی) کے قومی کنوینر اور وزیر اعلی اروند کجریوال کی جگہ لینے جا رہی ہیں۔

کجریوال نے 15 ستمبر اتوار کو اپنے استعفیٰ کا اعلان کیا تھا۔ اس کے بعد وہ آج لیفٹیننٹ گورنر وی کے سکسینہ سے ملاقات کریں گے اور اپنا استعفیٰ پیش کریں گے۔اس سے پہلے پیر کی شام کو عام آدمی پارٹی کی سیاسی امور کی کمیٹی کی میٹنگ ہوئی تھی۔

اس میٹنگ میں سی ایم کیجریوال نے ایک ایک کر کے تمام ممبران سے بات کی اور سی ایم کے عہدے کے لیے ان کی رائے مانگی۔ جہاں تمام اراکین نے آتشی کا نام تجویز کیا۔اس کے بعد آج قانون ساز پارٹی کی میٹنگ ہوئی، اس میٹنگ میں آتشی کا نام تجویز کیا گیا، جس پر تمام ایم ایل ایز نے اتفاق کیا۔