وقف ترمیمی بل: جے پی سی اجلاس کب؟ کرن رجیجو نے دی جانکاری

نئی دہلی ، ۲۵؍ستمبر ( آئی این ایس انڈیا )

وقف (ترمیمی) بل کا جائزہ لینے کے لیے تشکیل دی گئی پارلیمنٹ کی مشترکہ کمیٹی پارلیمنٹ کے آئندہ سرمائی اجلاس کے پہلے ہفتے تک اپنی رپورٹ پیش کرنے کا امکان ہے۔ اقلیتی امور کے وزیر کرن رجیجو نے کہا کہ کمیٹی کو اب تک ایک کروڑ سے زیادہ نمائندگی موصول ہوئی ہے۔مودی 3.0 حکومت میں 100 دنوں میں اقلیتی امور کی وزارت کی کامیابیوں کے بارے میں بات کرتے ہوئے کرن رجیجو نے کہا کہ کمیٹی مختلف سرکاری اور سماجی تنظیموں سے خیالات اور تجاویز طلب کر رہی ہے اور اس پر وسیع تبادلہ خیال کیا جا رہا ہے۔

اس کے ساتھ انہوں نے زور دے کر کہا کہ وقف بل میں پہلے بھی ترامیم کی جا چکی ہیں لیکن اس بار اتنے بڑے پیمانے پر بحث ہو رہی ہے جو پہلے کبھی نہیں ہوئی۔انہوں نے اسے جمہوریت کے لیے اچھا قرار دیا۔ مودی حکومت کے تحت اقلیتی برادریوں کی بہبود کے لیے کیے گئے حکومتی اقدامات پر بات کرتے ہوئے، رجیجو نے کہا کہ حکومت تمام اقلیتوں کی فلاح و بہبود کو یقینی بنا رہی ہے اور انہیں ایک محفوظ ماحول اور بہتر مواقع فراہم کر رہی ہے۔ انہوں نے کانگریس پر الزام لگایا کہ ان کے دور میں اقلیتی وزارت سے مراد صرف مسلمان تھے اور اس کے وزرا بھی اسی کمیونٹی سے تھے۔

انہوں نے کہا کہ اس میں تبدیلی کرکے مودی حکومت نے دیگر اقلیتی برادریوں کو بھی ترجیح دی۔ اور اب تمام 6 برادریوں کو اقلیتی وزارت میں نمائندگی دی گئی ہے۔ انہوں نے کہا کہ حکومت نے مسلم کمیونٹیز کے مفادات کو ترجیح دی ہے۔ حج کے سفر پر بات کرتے ہوئے وزیر نے بتایا کہ حج سہولت ایپ تمام عازمین حج کی سہولت کے لیے شروع کی گئی ہے۔ حج سہولت ایپ حاجیوں کو تمام ضروری معلومات اور ہنگامی سہولیات فراہم کرتی ہے۔ یہ حکومت کی کاوشوں کا نتیجہ ہے کہ دنیا میں دوسرے نمبر پر سب سے زیادہ حاجی بھارت سے مکہ جاتے ہیں جن کی تعداد تقریباً 1 لاکھ 75 ہزار ہے۔