وقف ترمیمی بل پر اب لی جائے گی جمعیۃ علماء ہند کی رائے.
رام مندر کے وکیل کو بھی ملا جے پی سی کی اگلی میٹنگ کا دعوت نامہ
نئی دہلی،11اکتوبر (الہلال میڈیا)
وقف بورڈ ترمیمی بل پر جے پی سی کی اگلی میٹنگ 14 اور 15 اکتوبر کو ہوگی۔ جمعیۃ علماء ہند دہلی کو بلایا گیا ہے کہ وہ 14 اکتوبر کو پہلے اجلاس میں بل پر اپنی رائے پیش کرے۔ دوسرے سیشن میں تین وکلاء وشنو شنکر جین، اشونی اپادھیائے، وریندر اچلکرنجیکار کو اپنا کیس پیش کرنے کے لیے بلایا گیا ہے۔ جے پی سی نے 15 اکتوبر کو اقلیتی وزارت کے عہدیداروں کو طلب کیا ہے۔
مرکزی وزیر قانون کرن رجیجو نے لوک سبھا میں وقف بل 2024 پیش کیا تھا جس کی کانگریس اور سماج وادی پارٹی سمیت کئی اپوزیشن جماعتوں نے مخالفت کی تھی۔ انڈیا اتحاد نے اسے مسلم دشمن قرار دیا۔ یہ بل لوک سبھا میں بحث کے بغیر مشترکہ پارلیمانی کمیٹی کو بھیج دیا گیا۔جے پی سی میں کل 31 ممبران شامل کیے گئے ہیں جن میں سے 21 ممبران لوک سبھا اور 10 ممبران راجیہ سبھا سے ہیں۔
