Skip to content
خطبہ حج اردو سمیت 37 زبانوں میں ترجمہ،پیغام ایک ارب سامعین تک پہنچا
ریاض،16جون ( آئی این ایس انڈیا )
حج کے موقعے پر خطبہ حج جسے ’خطبہ عرفات‘ بھی کہا جاتا ہے پوری اسلامی دنیا کے لیے اہم پیغام سمجھا جاتا ہے۔ سعودی عرب کی حکومت نے جہاں ایک طرف حجاج کرام کو جدید ٹیکنالوجی سے لیس بہترین سہولیات فراہم کرتے ہوئے مناسک کی ادائی میں ان کے لیے راحت وآرام کا انتظام کیا ہے وہیں خطبہ حج کو پوری دنیا میں زیادہ سے زیادہ لوگوں تک پہنچانے کے لیے خاطر خواہ انتظامات کیے ہیں۔
خطبہ حج کو براہ راست ٹیلی ویژن چینلوں، ایف ریڈیو اور انٹرنیٹ پر نشر کیا گیا اور اسے زیادہ سے زیادہ سامعین تک پہنچانے کے لیے 37 بین الاقوامی زبانوں میں ترجمہ کے ساتھ پیش کیا گیا۔خطبہ حج میں مملکت کی طرف سے بقائے باہمی، انسانی بھائی چارے،
مسلم بھائی چارے اور اعتدال پسندی پر مبنی حقیقی اسلامی تعلیمات کا پیغام دیا گیا۔خطبہ حج کا کئی عالمی زبانوں میں ترجمہ خادم حرمین شریفین کے پیغام حج کو پوری دنیا کے لوگوں بالخصوص مسلمانوں تک پہنچانے کی مساعی جلیلہ کا ثمر ہے۔ آج کے خطبہ حج میں امام کعبہ نے مذہبی رواداری،بھائی چارے اور عالمی امن کی اقدار کو عام کرنے پر زور دیا۔
خطبہ عرفہ کا ترجمہ کرنے کا منصوبہ خادم حرمین شریفین شاہ سلمان بن عبدالعزیز آل سعود کی سخاوت مندانہ رہ نمائی میں سنہ 1439ھ میں شروع کیا گیا۔ آغاز میں یہ پانچ زبانوں پر مشتمل تھا مگراب اس کا دائرہ 50 زبانوں تک پھیل گیا ہے۔خطبہ عرفہ کا ترجمہ کرنے کا منصوبہ ہر سال پھیل رہا ہے۔ اس کے سامعین کی تعداد میں بھی تیزی کے ساتھ اضافہ ہو رہا ہے۔ جدید ٹیکنالوجی کا استعمال کرتے ہوئے خطبہ حج کو ٹی وی چینلوں،ایف ایم ریڈیو اور دیگر پلیٹ فارم پر نشر کیا جاتا ہے۔
Like this:
Like Loading...
